Aqil Babayevin ailəsindən müraciət: “Səsimiz eşidilsin, müraciətimiz diqqətdən kənarda qalmasın və iş ədalətlə araşdırılsın”

Babayev Aqil Zalış oğluna qarşı Natiq Sadıqov və onun başçılıq etdiyi mütəşəkkil cinayətkar dəstənin planladığı cinayət nəticəsində Bakı şəhəri, Xəzər rayonu, Buzovna qəsəbəsi, M.Nağıyev küçəsi, ev 32B ünvanında törədilən cinayət hərəkətləri, həmin ünvanda bağ evimizdən külli miqdarda qızıl-zinət, külli miqdarda pul vəsaitləri və ABŞ dolları və Avro ilə müxtəlif miqdarlarda vəsaitlərinin quldurluq yolu ilə ələ keçirilməsi, Aqil Babayevə fiziki zor tətbiq etməklə onu köməksiz vəziyyətdə saxlamaqla azadlığını məhdudlaşdıraraq qanunsuz təcrid etmələri, bundan başqa hadisənin törədildiyi günün gecə saatlarında onun mobil telefonundan istifadə edərək və Aqilin adıından həyat yoldaşı ilə yazışma apararaq, etibarını süni formada qazanaraq Bakı şəhəri, Xətai rayonu, Rahim Məmmədov 1C ünvanında yerləşən mənzilə daxil olaraq xüsusi ilə külli miqdarda qızıl-zinət əşyalarını, 9 (doqquz) milyon manat pulun, 4 (dörd) yaşayış mənzilinin sənədlərini ələ keçirilməsi, eyni zamanda külli və xüsusi ilə külli miqdarda adı çəkilən yaşayış mənzilimizdən ABŞ dolları və Avronun oğurlanması, həyat yoldaşının 2 aylıq körpəsi ilə quldurluğa məruz qalması, bundan əlavə xüsusi mülkiyyəti olan “Shaurma №1” MMC-nin cinayətkar qruplaşma tərəfindən ələ keçirilməsi, habelə onların törətdikləri bu cinayətkar əməlləri ifşa edilməsinin qarşısının alınması üçün ailəsi tərəfindən ictimaiyyətə müraciət ünvanlanıb.

Aqil Babayevin oğlu Məhəmməd Babayev müraciətində yazır: “Natiq Sadıqovun başçılıq etdiyi cinayətkar dəstənin atama qarşı törətdiyi cinayət əməllərinin hələ də araşdırılmamış qaldığını bildirmək istəyirəm. Artıq beş ildən çoxdur ki, atama və ailəmizə qarşı təzyiqlər göstərilir. Bizi apardığımız mübarizədən çəkindirmək, ədalətin bərqərar olunması uğrunda səylərimizi dayandırmaq üçün dəfələrlə cəhdlər edilib. Lakin bütün bu təzyiqlərə baxmayaraq, həqiqətin üzə çıxması uğrunda mübarizəmizdən geri çəkilməmişik. Həmin cinayətkar dəstənin nəinki atama qarşı törətdiyi cinayətlər, hətta müxtəlif dövlət qurumlarını aldatmaq cəhdləri və dövlət mülklərin qanunsuz şəkildə mənimsənilməsi faktları da aşkar olunub. Cinayət əməlini törədən əsas şəxslər barəsində müvafiq orqanlarda cinayət işi belə başlanılıb. Atamın işinin düzgün araşdırıldığı halda, əminəm ki, bu cinayətkar dəstənin ictimaiyyətə məlum olmayan digər cinayətləri də üzə çıxacaq. Bundan əlavə, xüsusi olaraq qeyd etmək istəyirəm ki, bu dəstəyə rəhbərlik edən Natiq Sadıqov, Anar Aslanov və digər şəxslər cinayət işində adı hallanan, guya zərərçəkmiş qismində təqdim olunan bəzi şəxslərin törədilmiş cinayətləri etiraf etməsinə və həqiqəti açıqlamaq cəhdlərinə dəfələrlə mane olublar. Onlardan bəziləri maddi vəsaitlə şirnikləndirilib, digərlərinə isə fiziki zorakılıq tətbiq edilərək təzyiq göstərilib. Beləliklə, atama qarşı törədilmiş cinayət əməllərinin gizlədilməsinə və həqiqətin üzə çıxmasının qarşısının alınmasına kobudcasına nail olunub. Bu faktlar həmin şəxslərin yalnız bir ailənin taleyinə təsir etmədiyini, eyni zamanda cəmiyyətin təhlükəsizliyi və ədalət prinsipləri üçün nə qədər ciddi təhlükə yaratdığını göstərir. Mən bir oğul kimi atamın işinin ədalətli şəkildə araşdırılmasını, bütün cinayət əməllərinə hüquqi qiymət verilməsini və bu əməlləri törədən şəxslərin qanun qarşısında məsuliyyətə cəlb olunmasını istəyirəm”.

Aqil Babayevin anası Havanisə Babayeva da müraciətində oğluna qarşı bu cinayətləri törədən dəstənin məsuliyyətə cəlb olunmasını xahiş edir: “Bir ana olaraq mənim yeganə istəyim həqiqətin üzə çıxması, oğlumun haqqının özünə qaytarılması və ədalətin bərpa olunmasıdır. Xahiş edirəm, səsimiz eşidilsin, müraciətimiz diqqətdən kənarda qalmasın və oğlumun işi ədalətlə araşdırılsın. Natiq Sadıqov və onun rəhbərlik etdiyi mütəşəkkil cinayətkar dəstə yalnız ailəmizə və oğlum Aqil Babayevə qarşı deyil, həmçinin müxtəlif dövlət qurumlarını və vəzifəli şəxsləri qəsdən yanlış məlumatlandırmaqla onları aldatmağa nail olmuş, saxta və təhrif edilmiş məlumatlar əsasında qərarların qəbul edilməsinə təsir göstərmişdir. Nəticədə dövlət orqanlarının resurslarından və səlahiyyətlərindən qanunsuz məqsədlər üçün istifadə edilməsinə zəmin yaradılmış, dövlətin vəsait və imkanlarına zərər vurulmuşdur. Hesab edirik ki, bu şəxslərin fəaliyyəti nəticəsində dövlət əmlakının və maliyyə vəsaitlərinin qanunsuz mənimsənilməsi, vəzifəli şəxslərin etimadından sui-istifadə edilməsi və dövlət maraqlarına zidd hərəkətlərə yol verilməsi halları da hərtərəfli araşdırılmalı, həmin əməllərin hüquqi qiyməti verilməli və təqsirkar şəxslər qanunvericiliyə uyğun məsuliyyətə cəlb edilməlidirlər”.