Noyabr ayının 19-u “Qazax” Xeyriyyə İctimai Birliyi İdarə heyətinin sədri, riyaziyyat elmləri doktoru professor İlham Pirməmmədov, İctimai Birliyin üzvləri Alı Qocayev, Varis Yolçuyev, Akif Aşırlı, Asim Nəbiyev, Nadir Diridağlı, Ələddin Qarayev, Mühüd Orucovun hərbçi dostları Əfsanəvi Kəşfiyyatçı, Xüsusi Təyinatlı Qüvvələrinin Tabor Komandiri, Aprel Döyüşləri zamanı Talış Yüksəkliyini azad edilməsində xüsusi qəhrəmanlıq göstərmiş, 🇦🇿 Qəhrəmancasına Şəhid olan kapitan Mühüd Orucovun ailəsi ilə görüşdülər.
Görüşdə Mühüd Orucovun şücaətindan, Qəhrəmanlıq yolundan, Vətənin azadlığı uğrunda göstərdiyi rəşadətdən söhbət açıldı.
İlham Pirməmmədov Mühüd Orucovun qəhrəmanlığının sədasını onun hərb yoluna bələd hərbçi dostlarının, onu tanıyan hər kəsin xatirələrindən qürurla, iftixarla eşitməsini təkcə Qazax üçün deyil, Azərbaycan xalqı üçün qürur mənbəyi, Qəhrəmanlıq məktəbi adlandırdı: “Mühüdün Qəhrəmanlığı haqqında danışanda biz Qəhrəmanlığın Mühüd Zirvəsinin necə əzəmətli olduğunu görürük. Mühüdin Qəhrəmanlığı İlahi vergisi idi. Mühüd Xüsusi Təyinalı Qüvvələrdə özündən sonra gələn nəsillər üçün bir məktəbdir”. “Qazax həm şairlər yurdudur, həm də saysız-hesabsız qəhrəmanlar, pəhləvanlar yetirib. Xüsusi Təyinatlı Qüvvələrinin ehtiyatda olan polkovniki, Vətən Müharibəsi iştirakçısı, “Qazax” Xeyriyyə İctimai Birliyinin üzvü Eldəniz Namazov Mühüdün xatirəsini hər zaman hörmətlə yad edir. Onun Şəhid olmasını ordumuz, xalqımız üçün sarsıdıcı itki olduğunu deyir. Bu gün Eldəniz Namazov da bizimlə birlikdə bu görüşdə iştirak etməli idi. Üzrlü səbəbdən gələ bilmədi. Digər görüşlərimizdə Eldəniz bizimlə birlikdə olacaq” -deyə İlham Pirməmmədov qeyd edib.
“Mühüd Orucov döyüş tapşırıqlarına hər zaman gülə-gülə gedib. Döyüş tapşırığı əmrini eşidəndə Mühüdün sevinci dünyaya sığmırdı. Elə istəyirdi ki, həmişə döyüş tapşırığı Mühüdə tapşırılsın”, deyə zabit dostları qeyd edib.
Akif Aşırlı, Nadir Diridağlı, Varis Yolçuyev Mühüd Orucovun Qəhrəmanlığı haqqında silsilə yazıların yazılmasının, film çəkilməsinin, onun Qəhrəmanlığının gələcək nəsillərə çatdırılmasının vacib olduğunu vurğuladılar: “Aprel Döyüşləri Vətən Müharibəsinə gedən yolun başlanğıcı idi. Mühüd Orucovun qəhrəmanlığını gələcək nəsillərə çatdırmaq qələm adamlarının, rejissorların üzərinə düşən ən şərəfli işdir. Onun qəhrəmanlığından əsərlər yazılmalı, filmlər çəkilməlidir”.
Alı Qocayev Mühüd Orucovun həyatını, qəhrəmanlığını Azərbaycan hərb tarixində xüsusi xidmət olaraq dəyərləndirdi: “Mühüd Orucov kimi hərbçilər tək-təkdir. Onun döyüş yolu haqqında danışılanları dinlədikcə insan qürur hissi keçirir. Mühüd Orucov xalqımıza qürur hissi yaşadan zabitdir”.
Görüş iştirakçıları Mühüd Orucovun əkiz övladları Anar və Vüqarla səmimi söhbət etdilər. Ataları ilə Azərbaycan xalqının fəxr etdiyini, onun xatirəsinin hər zaman həm dövlətimiz, həm də xalqımız tərəfindən uca tutulduğunu bildirdilər.
“Qazax” Xeyriyyə İctimai Birliyinin mətbuat xidməti
