Xarici İşlər Nazirliyi tender müsabiqəsi keçirmədən “Şərq-Qərb” ASC (VÖEN – 2000043631) ilə satınalma müqaviləsi imzalayıb. Nazirlik “Diplomatiya Aləmi” jurnalının 61-ci buraxılışının nəşr olunması üçün “Şərq-Qərb” ASC-yə 8 min manat ödəyəcək.
Məlumat üçün bildirək ki, “Şərq-Qərb” ASC 14 sentyabr 2001-ci ildə dövlət qeydiyyatına alınıb. Nizamnamə kapitalı 589 min 880 manat olan ASC Əhmədli qəsəbəsi, Aşıq Ələsgər küçəsi, ev 17 ünvanında yerləşir.
ASC ilə eyni ünvanda “Şərq-Qərb Mülk” MMC, “Şərq-Qərb Nəşriyyat Evi” MMC və “Qlobal East West” MMC də yerləşir.
Qeyd edək ki, bu ünvanda vaxtı ilə 4 nömrəli Bakı Kitab Mətbəəsi fəaliyyət göstərib. 2001-ci ildə özəlləşdirilərək “Şərq-Qərb” ASC-yə çevrilib. Açıqlanan son hesabatlarda “Şərq-Qərb” ASC-nin səhmlərinin 96,5%-inin Mehdiyev Teymur Ramiz oğluna məxsus olduğu bildirilib.
Reyestr məlumatlarında Mehdiyev Teymur Ramiz oğlunun qeydiyyat ünvanı Bakı şəhəri İstiqlaliyyat küç., ev 9, m. 31 göstərilir ki, həmin ünvanda həm də Prezident Aparatının sabiq rəhbəri, AMEA-nın keçmiş Prezidenti Ramiz Mehdiyev qeydiyyatdadır.
Qeyd edək ki, dövlətə xəyanətdə ittiham olunan və barəsində 4 ay müddətinə ev dustaqlığı qətimkan tədbirinin seçilən Ramiz Mehdiyevin yeganə oğlu general-mayor Teymur Mehdiyev bir müddət əvvəl fövqəladə hallar nazirinin müavini vəzifəsindən azad olunub.
Yeniavaz.com
