Azərbaycanda dövlət mülkiyyətinə keçirilmiş əmlakın satışı ilə bağlı növbəti hərrac cəmiyyətdə maraq doğuracaq səviyyədədir.
Musavat.com xəbər verir ki, söhbət təsadüfi mallardan yox, müsadirə olunmuş qızıl, gümüş və digər qiymətli metallardan gedir. Üstəlik, bu metal-kolleksiyasının start qiyməti az qala yarım milyon yox, tam 711 min 96 manat 76 qəpikdir. Yəni Gömrük Komitəsinin bu dəfə satışa çıxardığı xəzinə orta statistik daşınmaz əmlakın, hətta bir neçə mənzilin dəyərindən daha bahadır.
Dövlət Gömrük Komitəsini (DGK)saytında yer alan məılumatda hərracın 19 dekabr 2025-ci il tarixində saat 15:00-da Əmlak Xidmətləri Məkanında keçiriləcəyi qeyd olunur. Hərrac Bakı şəhəri, Nəsimi rayonu, Səməd Vurğun küçəsi, ev 83, mənzil 4/3 ünvanında baş tutacaq. Bakının mərkəz ölkənin ən bahalı qızıl kolleksiyalarından biri satışa çıxarılacaq.
DGK qızıl-zinət əşyalarının mənşəyi ilə bağlı məlumatı da açıqlayıb. Qeyd olunur ki, satışa çıxarılan qiymətli metallar dövlət mülkiyyətinə keçirilmiş – yəni gömrükdə saxlanılan, bəyan edilməyən, qaçaqmalçılıq və ya digər pozuntular üzrə müsadirə olunan əmlakdır.
700 min manatlıq qızıl haradan və kimdən müsadirə edilib?
Formal cavab yoxdur, çünki qanun buna imkan vermir. Amma hərrac faktının özü onu göstərir ki, Komitəyə təqdim edilən, lakin rəsmiləşdirilməyən, yaxud ölkəyə qanunsuz yollarla keçirilməyə cəhd edilən qiymətli metal axını hələ də böyükdür.
Hərraca giriş üçün “qızıl şərtlər”
Hərracda iştirak etmək üçün hər bir namizəd:
– Əmlakın start qiymətinin 5 faizi qədər beh ödəməlidir. İndiki halda bu rəqəm 35 min 554 manat 84 qəpik edir. Üstəlik, 0,5 faiz iştirak haqqı da əlavə olunur. Bu məbləğ isə 3 min 555 manat 50 qəpikdir.
Nəticədə, hərrac zalına daxil olmaq üçün tələb olunan ilkin ödəniş təxminən 39 min manatdır. Hərrac Azərbaycan vətəndaşı olan hər kəsin üzünə açıqdır, təkcə gömrük işçilərinə qadağa var.
Nazirlər Kabinetinin müvafiq qərarına əsasən, Gömrük Komitəsinin və tabeliyindəki qurumların əməkdaşları, eləcə də onların ailə üzvləri belə hərraclarda nə birbaşa, nə də dolayı şəkildə iştirak edə bilməzlər.
Qızıllar konkret kimlərin əlinə keçəcək?
Məsələ ondadır ki, hərracda iştirak üçün tələb olunan vəsait kifayət qədər böyükdür ki, bu proses faktiki olaraq yalnız iri biznes dairələrinin maraq zonasında ola bilər. Hərrac qaydalarına görə, məlumat dərc olunan andan etibarən beh və iştirak haqqını ödəyən şəxslərə əmlakla tanış olmaq imkanı yaradılır. Yəni qızılları gözü ilə görmək belə minlərlə manatlıq ilkin ödənişdən sonra mümkündür.
700 minlik qızılın sahibi kim olacaq?
Hərracın nəticəsi indidən maraq doğurur. Digər hərraclardan fərqli olaraq bu dəfə söhbət geniş qiymətli metal kolleksiyasından gedir. Bu kolleksiya istər zərgərlər, istər investisiya şirkətləri, istərsə də qızıl alveri edən iri biznes qrupları üçün cəlbedicidir.
E.MƏMMƏDƏLİYEV,
Musavat.com
