23 noyabr səhər saatlarından başlayaraq Sabunçu rayonu, Bakıxanov qəsəbəsi, C. Axundzadə küçəsində baş verənlər yerli sakinlərin ciddi narazılığına səbəb olub.
Sözügedən ərazidə yaşayan bir qrup sakin “AzPolitika”-ya müraciətində “Darvaz MMC” adlı MTK-nın sahibi Namazov Faiq Mirzəli oğlunun qanunsuz olduğunu iddia etdikləri əməllərindən şikayətləniblər.
Sakinlərin bildirdiyinə görə, həmin MTK-nın qarşısındakı ərazidə anidən, onlara xəbərdarlıq edilmədən, məlumat lövhəsi qoyulmadan tikinti işlərinə başlanılıb. Səhər saatlarında əraziyə gələn işçilər bir neçə nöqtəni işarələyib, ölçü aparıblar. Qonşular yaxınlaşıb soruşduqda isə onlara “buranı tikirik” cavabı verilib.
Həmin ərazidə yaşayan Məmmədov Arzuman Fəxrəddin oğlu bildirib ki, bu ərazi onların illərdir istifadələrində olan, hətta dədə-baba torpağı hesab etdikləri məkandır. Onun sözlərinə görə, tikinti ilə bağlı əraziyə nə lövhə qoyulub, nə məlumat verilib, nə də qonşularla hər hansı danışıq və ya razılaşma aparılıb: “Heç bir bildiriş olmadı. Buranı özümüz abadlaşdırmışıq – asfaltını yeniləmişik, kanalizasiya və drenaj xətlərini çəkmişik, zibil sahəsini səliqəyə salmışıq. İndi isə heç bir sənəd göstərmədən gəlib ərazini zəbt edirlər”.
Yerli sakinlərdən Məmmədov Kamran Kamil oğlu isə qeyd edir ki, ətrafda uşaqların oynaya biləcəyi, xeyir-şər mərasimlərinin təşkil olunduğu yeganə ərazi buradır və buranı da kimlərsə öz mənafeyi hesabına zəbt etməyə çalışır: “Mən öz övladlarımı bu ərazidə böyütmüşəm. Burada həm qonşular bir-biri ilə ünsiyyət qurub, həm də müxtəlif mərasimlər üçün palatka qurulub. Ona görə də bu ərazi bizim üçün sıradan bir yer deyil. İndi kimlərsə öz şəxsi maraqları naminə bura sahib çıxmağa çalışır. Bu ərazidə yaşayan bu qədər insanın hüquqlarının pozulması deməkdir”.
Sakinlərin sözlərinə görə, adı MTK sahibi kimi çəkilən Namazov Faiq Mirzəli oğlu Bakı Dövlət Universitetinin müəllim heyətində təmsil olunur, hətta professor olduğu deyilir.
Lakin sakinlər bu statusun onun davranışları ilə uyğun gəlmədiyini qeyd edirlər: “Professor dediyin insan cəmiyyətin rifahını düşünməlidir. Bu isə əksinə, dövlətin adından istifadə edib, bizə hədə-qorx gəlir. Deyir ki, burada nə istəsəm, tikəcəm. Biz sual edirik – BDU-nun müəllimi necə olur ki, belə imtiyazlarla həm binanı tikir, həm də əhalinin ərazisini zəbt edir?”
Bakıxanov sakinləri baş verənləri qanunsuzluq hesab edir və məsələ ilə bağlı dövlət qurumlarının müdaxiləsini, obyektiv araşdırma aparılmasını və tikintinin dayandırılmasını tələb edir.
Qeyd olunanlarla bağlı qarşı tərəfin, eyni zamanda Sabunçu Rayon İcra Hakimiyyətinin mövqeyini öyrənməyə çalışırıq.
“AzPolitika.info”
