Son illər regionların sosial-iqtisadi inkişafı dövlət proqramlarının uğurlu icrası sayəsində nəinki paytaxt Bakı, eləcə də respublikamızın bölgələri gündən-günə gözəlləşir. Bunu ölkə Prezidenti İlham Əliyevin diqqət və qayğısı sayəsində uğurla inkişaf edərək müasir və abad rayonlardan birinə çevrilən Qazax rayonunun timsalında aydın şəkildə görmək olar.
Rayonda geniş miqyas alan quruculuq işləri bunun əyani sübutudur. Bu gün sözün əsl mənasında əminliklə söyləyə bilərik ki, Qazax rayonu özünün intibah dövrünü yaşayır. Qısa zaman kəsiyində görülən işlər sayəsində Qazax tərəqqi yolunda uğurla addımlayır. Bu gün rayonda elə bir sahə olmaz ki, ötən illər ərzində həmin sahələrdə yeniliyin şahidi olmayasan.
Xüsusilə də ölkə başçısının tapşırığına əsasən “Azərsu” ASC tərəfindən Qazax şəhərinin içməli su və tullantı su sistemlərinin yenidən qurulması layihəsinin icrasından sonra küçələrin asfaltlanması, səkilərə yeni tamet, bardür düzülməsi, qaz, elektrik, rabitə xətlərinin səliqəyə salınması, küçələrin işıqlandırılması dediklərimizin bariz nümunəsidir. Şəhərin Heydər Əliyev prospektində, bir neçə küçədə, eləcə də çoxmənzilli yaşayış binalarının həyətinə yeni asfalt örtüyü vurulmuş, abadlıq işləri aparılaraq “Abad məhəllə” kimi sakinlərin istifadəsinə verilib.
Sevindirici haldır ki, rayonda aparılan abadlıq-quruculuq işləri bu il də uğurla davam etdirilir. Rayonda nəqliyyat vasitələrinin hərəkətinin yaxşılaşdırılması, vətəndaşların rahatlığını təmin etmək məqsədilə təqdirəlayiq işlər görülür. Bu günlərdə rayonda daha 4 küçəyə – şəhərin Nəsrəddin Tusi, şəhid Yunis Kazımov (Bakı küçəsindən M.Ə.Rəsulzadə küçəsinin kəsişməsinə kimi), Ağköynək kəndində Çərkəz İsmayılov və Cabir Hüseynov (Mehdi Hüseyn küçəsinin kəsişməsindən magistral yola kimi) küçələrinə yeni asfalt örtüyü döşənib.
Hazırda isə şəhərin Nəriman Nərimanov yaşayış massivində aparılan abadlıq işləri onu söyləməyə əsas verir ki, illər bir-birini əvəz edir və Qazax respublikamızın abad rayonları sırasına daxil olur.
Yanvarın 22-də Qazax Rayon İcra Hakimiyyətinin başçısı Rəcəb Babaşov sözügedən ərazidə aparılan abadlıq işləri ilə tanış olub, görüləcək işlərlə bağlı müvafiq tapşırıqlarını verib.
Görülmüş işlər vətəndaşlar tərəfindən də razılıqla qarşılanır. Sakinlər rayonda aparılan quruculuq və abadlıq işlərinə görə ölkə Prezidenti İlham Əliyevə minnətdarlıq edirlər..
