2024-cü ilin dekabrın 25-də Aktau şəhərində baş vermiş Azərbaycan Hava Yollarına məxsus təyyarə qəzasında həlak olanların xatirəsinə ehsan verilib.
Cumhuriyyet.az xəbər verir ki, Qazaxıstanın Azərbaycandakı səfirliyi və Manqistau vilayətinin Akimatı təşkil etdiyi tədbirdə Manqistau vilayətinin Akimi Nurdaulet Kilıbay, Qazaxıstanın Azərbaycandakı səfiri Alim Bayel, Azərbaycanın Qazaxıstandakı səfiri Ağalar Atamoğlanov, Azərbaycanın Aktau şəhərindəki Baş Konsulu Ayxan Süleymanlı, həlak olmuş qazaxıstanlıların ailə üzvləri, Azərbaycan diasporunun nümayəndələri, xilasetmə işlərində iştirak etmiş qurumların nümayəndələri və Aktau şəhərinin sakinləri iştirak ediblər.
Əvvəlcə “Quran-i Kərim”dən ayələr oxunub.
Manqistau vilayətinin Akimi Nurdaulet Kilıbay həlak olanların yaxınlarına başsağlığı verərək bildirib ki, Qazaxıstan Prezidenti Kasım-Jomart Tokayevin tapşırığı ilə qəzanın nəticələrinin aradan qaldırılması, səbəblərinin araşdırılması və zərərçəkənlərə yardım göstərilməsi məqsədilə Hökumət Komissiyası yaradılıb. Qazaxıstanın aidiyyəti qurumları, o cümlədən Manqistau vilayətinin Akimatı faciə günlərində bütün zəruri tədbirləri görüb. Nurdaulet Kilıbay xilasedicilərə, tibb işçilərinə və bütün laqeyd qalmayan qazaxıstanlılara bir daha təşəkkürünü bildirib.
Qazaxıstanın Azərbaycandakı səfiri Alim Bayel vurğulayıb ki, bu gün Qazaxıstan və Azərbaycan arasındakı münasibətlər həqiqətən də müttəfiqlik xarakteri alıb. O, Xəzər dənizinin şərq və qərb sahillərində yerləşən Qazaxıstanın və Azərbaycanın türk dünyasının mühüm oyunçuları, həmçinin Avrasiya nəqliyyat-logistika sisteminin əsas həlqələri olduğunu vurğulayıb.
Bayel, faciədən sonra ölkələrimiz arasındakı dostluğun və qardaşlığın daha da möhkəmləndiyi ilə bağlı Azərbaycan Prezidenti İlham Əliyevin dediyi sözləri xatırladıb. Bu kontekstdə o, azərbaycanlı iş adamı Amil Yusifovun təyyarə qəzasında həlak olanların ailələrinə yardım göstərmək təşəbbüsünü Qazaxıstan tərəfindən minnətdarlıqla qarşılandığını qeyd edib.
Tədbir çərçivəsində Amil Yusifov həlak olmuş qazaxıstanlıların yaxınlarına Almatı şəhərindəki yeni yaşayış kompleksində yerləşən beş ikiotaqlı mənzillərin açarlarını təqdim edib. Bundan əlavə, xeyriyyəçi Manqistau vilayətinin Fövqəladə Hallar Departamentinə, Aktau şəhərinin xəstəxanasına, təcili və təxirəsalınmaz tibbi yardım stansiyasına üç yeni avtomobil bağışlayıb.
Həlak olanların yaxınları və zərərçəkənlərə yardım göstərmiş qurumların əməkdaşları azərbaycanlı iş adamına minnətdarlıqlarını ifadə ediblər. Manqistau vilayətinin Akimi N. Kilıbay də Manqistau vilayəti ictimaiyyəti adından təşəkkür edərək, tədbirin Qazaxıstan-Azərbaycan dostluğunun növbəti rəmzi olduğunu vurğulayıb.
