Kərəm Həsənovun “müqəddəs adlar” daşıyan qohumlarından sensasion xəbər var – QALMAQAL

Nepotizm (qohumbazlıq) Azərbaycan cəmiyyətini inkişafdan saxlayan əsas mənfi amillərdən biridir. Xüsusilə də dövlət idarəçiliyində əhəmiyyətli mövqe tutan yüksək vəzifəli şəxslərin öz qohumlarını layiq olmadıqları halda iyerarxiya nərdivanının müxtəlif strateji pillələrinə yerləşdirməsi maddi nemətlərin ədalətli bölüşdürülməsi prinsipini, azad rəqabət qaydalarını pozur, korrupsiyaya, monopoliyaya münbit şərait yaradır, dövlətin və cəmiyyətin ixtisaslı kadrların potensialından yararlanmasına mane olur, insanlar arasında haqlı narazılıq yaradır.
Reallıq budur: Çox vaxt məhz “ÇePe” baş verəndən sonra xəbər tuturuq ki, kiçik və orta manqadan olan məmur “Filankəs”, sən demə, daha yuxarı vəzifədə qərar tutan məmur “Bəhmənkəsin” qohumu imiş. Qohumbazlığına görə tez-tez qınağa tuş gələn yüksək mənsəbli məmurlardan biri də Prezidentin köməkçisi cənab Kərəm Həsənovdur. Cəmiyyət zaman-zaman Kərəm müəllimin qohumlarının nalayiq əməllərinin, qanunsuz hərəkətlərinin şahidi olur. Bu günlərdə cumhuriyyet.az-a etibarlı mənbədən K. Həsənovun qohumu – Gülüm adlı əmisinin nəvəsi Raci Müqəddəs oğlu Allahverdiyevin bəd əməli barədə məlumat daxil olub. Həmin məlumata görə, Post-Patrul Xidmətinin əməkdaşı olan R. Allahverdiyev öz komandiri tərəfindən rayon mərkəzində yerləşən zibilxananın yanına döyülüb. Bildirilir ki, döyülən polis əməkdaşı aldığı xəsarətdən koma vəziyyətinə düşüb və təcili Bakıya təxliyə olunub. Son durumu ilə bağlı hələlik məlumatımız yoxdur.
Bu hadisədən sonra, Raci Allahverdiyevin dayısı İlqar Gülüm oğlu Həsənov əmisi oğlu Kərəm Həsənov tərəfindən “mükafatlandırılaraq” bu günlərdə Günəşli kəndinə icra nümayəndəsi təyin edilib. Bir sözlə, K.Həsənovun qohumları nə qədər “müqəddəs” adlar daşısalar da, cəmiyyət onları “Allahın verdiyi bəla” kimi qiymətləndirir.