Təqdirəlayiq haldır ki, bu gün ölkəmizdə dövlətimiz tərəfindən talassemiyalı və hemofiliyalı xəstələrə xüsusi qayğı göstərilir. Respublika Prezidenti cənab İlham Əliyev tərəfindən donorluğun və qan xidmətinin inkişafına dair xüsusi sərəncamlar imzalanmış və müvafiq qanunlar qüvvəyə minmişdir. Eyni zamanda, talassemiya xəstəliyinin qarşısının alınması məqsədilə 2005-ci ildə “Talassemiyasız həyat naminə” layihəsinə start verilmişdir. Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü ilə keçirilən “Talassemiyasız həyat naminə” proqramı çərçivəsində ölkəmizin bütün bölgələrində mütəmadi olaraq qanvermə aksiyaları təşkil olunur.
İyunun 17-də Azərbaycan Respublikası Səhiyyə Nazirliyi “Respublika Qan Bankı” Publik Hüquqi Şəxs, Qazax Rayon İcra Hakimiyyəti və “Qazax Rayon Mərkəzi Xəstəxanası” Publik Hüquqi Şəxsin birgə təşkilatçılığı ilə talassemiyadan əziyyət çəkən uşaqlara və qana ehtiyacı olan digər xəstələrə dəstək olmaq məqsədilə Qazax rayonunda növbəti qanvermə aksiyası keçirilib.
Qazax Rayon Mərkəzi Xəstəxanasında təşkil olunan aksiyada Qazax Rayon İcra Hakimiyyətinin başçısı Rəcəb Babaşov, Respublika Qan Bankının həkim-hematoloqu Aynurə Niftullayeva, Respublika Qan Bankının Gəncə bölməsinin həkim hematoloqu Solmaz Zeynalova, “Qazax Rayon Mərkəzi Xəstəxanası” Publik Hüquqi Şəxsin direktoru Afiq Fərruxov, Rayon İcra Hakimiyyətinin, idarə, müəssisə və təşkilatların əməkdaşları, ictimaiyyət nümayəndələri iştirak edib.
Qazax Rayon İcra Hakimiyyətinin başçısı Rəcəb Babaşov aksiyanın keçirildiyi Qazax Rayon Mərkəzi Xəstəxanasına gəlib və qan verib.
Rayon rəhbərliyi Respublika Qan Bankının Gəncə bölməsinin əməkdaşları ilə görüşüb, səmimi ürək sözlərini çatdırıb, Qazaxda təşkil olunan qanvermə aksiyasına görə razılığını ifadə edib.
Respublika Qan Bankının Gəncə bölməsinin əməkdaşları qan donorluğunun təşkilatçılığında fəal iştirakına və verdiyi dəstəyə görə “Qazax Rayon Mərkəzi Xəstəxanası” Publik Hüquqi Şəxsin rəhbərliyinə minnətdarlıqlarını bildiriblər.
Müxtəlif qan xəstəliklərindən əziyyət çəkənlərə köməklik məqsədilə keçirilən tədbirdə Respublika Qan Bankının Gəncə bölməsinin əməkdaşları qan vermək istəyən vətəndaşları müayinə edib və onlara məsləhətlər verdikdən sonra qanverməyə hazırlayıblar.
Aksiya çərçivəsində qan vermək üçün xəstəxanaya 500 nəfərdən çox könüllü müraciət edib ki, onların 128 nəfərindən qan götürülüb.
