Məlum olduğu kimi, bu gün Bakı Ağır Cinayətlər Məhkəməsində hakim Elmin Rüstəmovun sədrliyi ilə dövlət əleyhinə açıq çağırışlar etməkdə təqsirləndirilən Mirədalət Talışxanovun barəsində Dövlət Təhlükəsizliyi Xidmətində (DTX) başlanılmış cinayət işi üzrə məhkəmənin hazırlıq iclası keçirilib. İclasda təqsirləndirilən şəxsin anket məlumatları dəqiqləşdirilib və baxış iclası iyulun 30-na təyin edilib.
DTX-nın həbs etdiyi Mirədalət Talışxanovla bağlı başlanan məhkəmə prosesi Prezident İlham Əliyevin 18 mart 2025-ci ildə Ağdərə rayonunun Həsənriz kəndinə səfərini və kənddəki sakinlərdən biri ilə dialoqunu yada salır. Xatırladaq ki, həmin səfər zamanı sakinlərdən biri kəndlərində müxalifətçinin olmadığını bidlirmiş, dövlət başçısı isə “əsqas dövlətə müxalifətdə olmasınlar” deyə cavab vermişdir:
“Kişi sakin: Bu sakinlər hamısı heyvandarlıqla məşğul olublar. Cənab Prezident, əmin edim ki, bizim kənddə müxalifətçi olmayıb. Bizim kəndin camaatından bir adam fikirləşə bilmirdi ki, kimsə müxalifətçi olub. Heç vaxt. Hamımız təsərrüfatla, dövlətə qulluqla məşğul olmuşuq. İndi də inanmıram, görməmişik, eşitməmişik.
Prezident İlham Əliyev: Olsa da bir problem yoxdur. Əsas dövlətə, dövlətçiliyə müxalifətdə olmasınlar”.
Dialoqdan da göründüyü kimi, dövlət başçısı kiminsə şəxsinə və ya hakimiyyətə qarşı müxalif olmasında problem görmədiyini bildirib və qeyd edib ki, əsas olan insanların dövlətə və dövlətçiliyə qarşı müxalifətdə olmamasıdır.
Dövlət başçısının məhz bu deyimi Azərbaycanda dövlətimizin, onun rəhbərinin tənqid və müxalifət anlayışına olan münasibətini əks etdirir. Yəni Azərbaycanda dövlətə müxalifətçilikdən başqa müxalifətçiliyin hər cür növünə dözümlü və anlayışlı yanaşılır, bütövlükdə müxalifətçilik demokratiyanın normal təzahürlərindən biri kimi qəbul edilir.
DTX tərəfindən həbs edilən və Cinayət Məcəlləsinin 32.4, 281.2-ci (dövlət əleyhinə yönələn açıq çağırışlar etməyə təhrik etmə, eyni əməllər təkrar və ya bir qrup şəxs tərəfindən törədildikdə) maddələri ilə ittiham edilən Mirədalət Talışxanovla bağlı başladılan məhkəmə prosesi də ölkəmizdə yalnız dövlətə müxalifətçiliyin bağışlanmadığını göstərir.
“Dövlətə müxalifətçilik” – bu, Azərbaycan dövlətinin “qırmızı xətti”ni təşkil edən əsas məsələlərdən biridir. Və DTX-nın Mirədalət Talışxanovu həbs etməsi, habelə, bu gün onunla bağlı başladılan məhkəmə prosesi bu yanaşmanın dövlətimiz üçün nə qədər ciddi və prinsipial olduğunun isbatıdır.
Seymur ƏLİYEV
