Cari ilin 27 iyul tarixində Vəhdət Partiyasının Abşeron rayon təşkilatının konfransı keçirilib. Demokrat.az xəbər verir ki, tədbir açıq elan olunduqdan sonra dövlət himni səsləndirildi və şəhidlərin xatirəsi bir dəqiqəlik sükutla yad edildi. İclasın idarə heyəti və katiblik seçildikdən sonra nümayəndələrin səlahiyyətləri təsdiqlənib. Konfransda 106 nəfər iştirak edib. Abşeron rayon təşkilatının sədrliyinə Atlas Əsədova yekdilliklə seçilib.
Ziyalı şairə Xumar Yusifli ilə yanaşı, GHT sədri Ələşbərova Aynura, alim Qurbanov Xəyal, qazi İbrahimov İbrahim və Said Zəydar, habelə tələbə Leyla çıxış edərək Vəhdət Partiyasının inkişafı, gənclərin və xanımların partiyada fəallığının artırılması, dövlətçilik dəyərləri və Prezident İlham Əliyevin siyasətinə dəstək fikirlərini bildiriblər.
Partiyanın sədri Adəm İsmayil Bakuvi çıxış edərək tədbir iştirakçılarına təşəkkürünü bildirib. O, Azərbaycanın beynəlxalq arenada mövqelərinin möhkəmlənməsində Prezident İlham Əliyevin siyasi kursunun həlledici rol oynadığını vurğulayıb. Gənclərə və qadınlara yönəlik dövlət siyasətinə uyğun olaraq, partiyada bu istiqamətdə işlərin daha da genişlənəcəyini qeyd edib.
