“Azərbaycan Dəmir Yolları” QSC-nın Sərnişin daşımaları departamentində Planlaşdırma və icraya nəzarət şöbəsinin keçmiş rəisi bildirir ki, iş yerində onlara çatası pulun kəsilməsinə etiraz etdiklərinə görə cəzalandırılıblar.
Onun sözlərinə görə, qanunsuz olaraq, işdən çıxarılıblar.
Mia.az Bizimyol.info-ya istinadla xəbər verir ki, keçmiş şöbə rəisi işə bərpa tələbi ilə məhkəmədə iddia qaldırıb.
O bildirib ki, uzun illərdir dəmiryolunda çalışır, bu müddətdə mükafatlara layiq görülüb.
Rəhbərlik etdiyi şöbədə işləyən Azad Ağayev ona deyib ki, onun 236 manat mükafat pulunu kəsiblər: “Buna aydınlıq gətirmək üçün şöbənin işçiləri ilə birlikdə Departamsntin rəisi Azər Fərəcovun yanına qalxdıq. Orada heç bir qanuna zidd hərəkət etməmişik. Sadəcə, danışıqlar yolu ilə məsələyə aydınlıq gətirmək istəmişik. Departamentin rəisi Azər Fərəcov ucadan qışqırırdı. Bizi otaqdan qovdu. İdarənin mühafizəçilərini çağırdı. Bu zaman məcbur olub “102”yə zəng elədim. Nəqliyyatda Polis İdarəsinin əməkdaşları həmin yerə gəldi. Bəzi araşdırmalar apardı, bununla da söhbət bağlandı”.
Onun sözlərinə görə, bir müddət sonra Nəqliyyatda Baş Polis İdarəsinə çağırıblar. Onlara məlum olub ki, “Azərbaycan Dəmir Yolları” QSC-nm sədr müavininin şikayəti əsasında onları çağırıblar. Orada onların haqqında İnzibati Xətalar Məcəlləsinin 510-cu (xırda xuliqanlıq) maddəsi ilə protokol tərtib olunub və 50 manat cərimə kəsilib. Daha sonra Əmək Məcəlləsinin 70 “ç” maddəsi ilə vəzifəsindən azad edilib.
“Azərbaycan Dəmir Yolları” QSC isə bu iddia ilə razılaşmır. Bu qurumun nümayəndəsi iddia edir ki, keçmiş şöbə rəisi haqsızdır. O, Departament rəisi Azər Fərəcovun otağında ona qarşı qeyri-etik hərəkətlərə yol verib:
“Mobil telefonla qarşı tərəfin razılığı olmadan audio və video qeydiyyat aparıb, yüksək səs tonu ilə danışaraq, departament rəisinə qarşı qeyri-etik ifadə və hərəkətlərə yol verib. Ona xidməti otaqdan getməsi bildirilsə də o, xidməti otağı uzun müddət tərk etməyərək, departament rəisinin iş rejimini pozub. Görülməli olan işlərin keyfiyyətli və vaxtında icra edilməsinə ciddi maneə törədib. Yalnız polis əməkdaşlarının müdaxiləsi nəticəsində xidməti otağı tərk edib”.
Lakin məhkəmə araşdırmalardan sonra keçmiş şöbə rəisinin haqlı olduğu qənaətinə gəlib və onun xeyrinə qərar çıxarıb. Qərar verilib ki, “Azərbaycan Dəmir Yolları” QSC-nin əmri ləğv edilsin, o, Sərnişin Daşımaları Departamentində Planlaşdırma və İcraya Nəzarət şöbəsinin rəisi vəzifəsinə bərpa edilsin.
