Nə İcra Hakimiyyəti, nə də Dövlət Şəhərsalma və Arxitektura Komitəsi bunca qanunsuzluğu “görmür”
Bakı şəhəri Səbail rayonu Salyan şossesi 32-də qanunsuz bina tikintisi həyata keçirilir. Bu barədə redaksiyamıza məlumat evrən mənbənin sözlərinə görə, artıq qanunsuz binanın beş mərtəbəsi inşa olunub. Lakin nə qədər qəribə də olsa bu qanunsuzluq nə Səbail Rayon İcra Hakimiyyəti, nə də Dövlət Şəhərsalma və Arxitektura Komitəsi tərəfindən “görünmür”. Əlaqədar qurumların heç biri bu qanunsuz tikiliyə müdaxilə etmir. Məhz bu səbəbdən də qanunsuz bina inşası sürətlə davam edir.
İşin ən maraqlı tərəflərindən biri də budur ki, qanunsuz binanın arxa hissəsində strateji obyektin inşası nəzərdə tutulub. Belə olan halda strateji qurumun bir addımlığında hündürmərtəbəli binanın inşası həm qanun, həm də məntiq baxımından yolverilməzdir. Lakin buna baxmayaraq, Səbail rayonu Salyan 32-də qanunsuz bina tikintisi tam sürətlə davam edir. Bu isə o deməkdir ki,
nə Səbail Rayon İcra Hakimiyyəti, nə də Dövlət Şəhərsalma və Arxitektura Komitəsi öz işinin öhdəsindən gələ bilmir. Və ya sözügedən qurumların bu qanunsuzluğa susmasının arxasında başqa məqamlar dayanır. Belə olmasaydı, Salyan şossesi 32-də bu nəhənglikdə qanunsuzluq meydana çıxmazdı.
