Naxçıvandan Türkiyəyə aparılan külli miqdarda heroin Dilucu Gömrük Məntəqəsində ələ keçib. Hurriyyet.az Türkiyə KİV-lərinə istinadən xəbər verir ki, dəyəri 10 milyon TL (təqribən 410 min AZN) olan narkotik İğdır Dilucu Gömrük Mühafizə, Qaçaqmalçılıq və Kəşfiyyat Müdirliyi əməkdaşlarının keçirdiyi əməliyyat nəticəsində aşkar olunub.
Məlumata əsasən, narkotiklər Azərbaycan Respublikasına məxsus 23-BM-910 / 75-ZA-119 dövlət nömrə nişanlı qoşqulu yük maşınının ehtiyat təkərində gizlədilibmiş. Rəsmi açıqlamaya əsasən, gömrükçülər tərəfindən yük avtomobilində aparılan risk analizi zamanı şübhəli maddə olduğu bilinib. Gömrük Mühafizə qrupları maşını rentgen müayinəsindən keçirildikdə içərisində şübhəli konsentrasiyalar aşkar edilib.
Daha sonra həmin əraziyə gətirilən “Narkotik detektoru” olan it də yük maşınına reaksiya verib və nəticədə ətraflı axtarış aparılıb. Bundan sonra yük maşınının ehtiyat təkərinin içərisində alüminium folqaya bükülmüş 5 ayrı çanta tapılıb. Çantalarda ümumi çəkisi 4,980 qram (təxminən 5 kiloqram) heroin olduğu müəyyən edilib.
Müsadirə edilən narkotiklərin hazırkı bazar dəyərinin təxminən 10 milyon 650 min türk lirəsi (təqribən 410 min AZN) olduğu təxmin edilir. Narkotikin İrandan gətirildiyi və Naxçıvan üzərindən Türkiyəyə keçirilməsinə cəhd olunduğu bildirilir.
Məlum hadisədən sonra yük maşınının sürücüsü, xarici ölkə vətəndaşı (Azərbaycan vətəndaşları olduqları güman edilir – red.) A.M. və avtomobilin sahibi Z.İ. narkotik qaçaqmalçılığı ittihamı ilə saxlanılıb. Onlar məhkəmə tərəfindən tutularaq həbsxanaya göndərilib.
“Bu uğurlu əməliyyat Dilucu Gömrük Mühafizə qruplarının ölkəyə narkotik vasitələrin keçirilməsi cəhdlərinə qarşı yüksək həssaslığını bir daha nümayiş etdirdi”, – deyə rəsmi açıqlamada vurğulanır.
Hurriyyet.az
