Prezident Administrasiyasının sabiq rəhbəri Ramiz Mehdiyev ətrafında baş verən son olaylar sadəcə boz kardinalın deyil, onun komandasına daxil olan digər şəxslərin aqibəti ilə bağlı müxtəlif ehtimal və müzakirələrə yol açmaqdadır. Hələlik Ramiz Mehdiyev komandasındakı yarpaq tökümünün kimin vurulması ilə start götürəcəyi dəqiq məlum olmasa da, bu şəxslərdən birinin FHN şefi olacağı ilə bağlı ehtimallar səslənməkdədir.
Media və sosial şəbəkədə yer alan məlumatlar göstərir ki, Ramiz Mehdiyevin oğlunun məhz FHN-də çalışması fövqəlnazirlə Ramiz Mehdiyev arasındakı münasibətlərin yaxşı olmasının ən böyük isbatı kimi təqdim edilir. Məhz bu prizmadan çıxış etsək, məlum faktı Ramiz Mehdiyev-Kəmaləddin Heydərov münasibətlərinin göstəricisi kimi qiymətləndirmək olar. Lakin Kəmaləddin Heydərovun Ramiz Mehdiyevin planlarında yer alıb-almadığı yalnız hüqiq-mühafizə orqanlarının araşdırması nəticəsində ortaya çıxacaq bir həqiqətdir və buna görə də bu barədə indidən əminliklə nə isə demək olmaz.
Bununla yanaşı, Ramiz Mehdiyevlə bağlı yaşanan olaylar fonunda FHN şefinin adının tez-tez hallanması da diqqət çəkən məqamlardan biridir.
Son günlərin hadisələri fonunda müşahidə edilən nüanslardan biri də fövqəladə hallar nazirinin sahib olduğu var-dövlətin ictimai müzakirəyə çıxarılmasıdır. Bu baxımdan jrunalist Elbəyi Həsənlinin 16 oktyabr tarixində facebookdakı hesabında yazdığı status xüsusilə maraq doğurur. Jurnalist yazır: “Maraqlıdır, görəsən niyə Azərbaycan mediası yalnız və yalnız vurulmuş məmurların oğurluq mülklərinin siyahısını xalqa təqdim edir. Məsələn, … Kəmaləddin Heydərovu götürək. Onun malı-mülkü Ramiz Mehdiyevdən azdırmı? Azərbaycanda Kəmaləddin Heydərov da daxil olmaqla nə qədər oğru oliqarx-məmur var? İtə tök, bir sürü. Vəzifə nə qədər böyükdürsə, oğurluğun miqyası da bir o qədər böyük olur”.
Göründüyü kimi, Ramiz Mehdiyevlə bağlı baş verənlərin nəticə etibarilə yalnız boz kardinal üçün deyil, eləcə də hakimiyyətin ali eşalonunda təmsil olunan bir çox şəxslər üçün acınacaqlı sonluqla nöqtələnəcəyi şübhəsizdir. Media və sosial mediada yer alan iddiaları ümumiləşdirsək, ehtimal etmək olar ki, bu şəxslərdən biri də Kəmaləddin Heydərov ola bilər.
