Cənubi Koreyada keçirilən Asiya-Sakit Okean İqtisadi Əməkdaşlıq sammiti çərçivəsində ABŞ prezidenti Donald Tramp və Çin Xalq Respublikasının sədri Si Cinpin arasında görüş baş tutub.
Musavat.com “Reuters”ə istinadən xəbər verir ki, görüşdə tərəflər arasında bir sıra iqtisadi razılaşmalar əldə olunub.
Si Cinpini görüşdə xarici işlər naziri Vanq Yi, aparat rəhbəri Cai Qi, Milli İqtisadi Planlaşdırma Komissiyasının sədri Çjen Şanje və ticarət naziri Vanq Ventao müşayiət edib.
ABŞ tərəfini isə dövlət katibi Marko Rubio, maliyyə naziri Skott Bessent, ABŞ-ın Çindəki səfiri Devid Perdu və Ağ Evin aparat rəhbəri Syuzan Uayls təmsil edib.
Çin mediasının məlumatına görə, iki lider arasında danışıqlar bir saat 40 dəqiqə davam edib. Görüş başa çatdıqdan sonra Tramp “Air Force One” təyyarəsi ilə Vaşinqtona qayıdıb.
Tramp görüşü “əla” adlandırıb.
Görüşün nəticəsi olaraq bir sıra razılaşmalar əldə edilib:
ABŞ-dan Çinə soya satışları dərhal bərpa olunacaq;
Fentanil üzərinə qoyulan tariflər 20%-dən 10%-ə endiriləcək;
Ümumi tarif dərəcələri 57%-dən 47%-ə azaldılacaq;
Çin nadir torpaq elementlərinin ixracını davam etdirəcək, bu məsələ tam həll olunub;
Çin, ABŞ-ın NVIDIA şirkəti ilə çip istehsalı sahəsində danışıqlara başlayacaq.
ABŞ prezidenti həmçinin bildirib ki, Si Cinpin Ukrayna münaqişəsinin həlli istiqamətində vasitəçilik etməyə hazır olduğunu bəyan edib.
Tərəflər həmçinin razılaşıblar ki, Donald Tramp apreldə Çinə, Si Cinpin isə yaxın vaxtlarda ABŞ-a səfər edəcək.
Tramp əlavə edib ki, danışıqlar zamanı Tayvan məsələsi və Rusiya nefti ilə bağlı ticarət məsələləri müzakirə olunmayıb.
