Musavat.com xəbər verir ki, Vaşinqtonun mərkəzində, Ağ Evə çox yaxın ərazidə silahlı insident baş verib.
İlkin məlumatlara görə, bir neçə ABŞ Milli Qvardiyası əməkdaşı yaralanıb. Hadisə yerinə polis və təcili yardım briqadaları cəlb edilib.
Məlumata əsasən, yaralananların ən azı ikisi hərbçidir. Onların vəziyyəti barədə rəsmi açıqlama hələlik yoxdur.
Hadisəni törətməkdə şübhəli bilinən şəxsin harada olması məlum deyil. ABŞ xüsusi xidmət orqanları ərazini tam nəzarətə götürüb, perimetr boyu gücləndirilmiş təhlükəsizlik tədbirləri tətbiq olunub. Bir neçə küçə bağlanıb, polis və federal xidmətlərin helikopterləri bölgədə müşahidə aparır.
ABŞ mediası bu insidenti “son illərdə Ağ Evə ən yaxın silahlı hücum” kimi qiymətləndirir.
Vaşinqtonda iki Milli Qvardiya hərbçisi Ağ Ev yaxınlığında qətlə yetirilib — Tramp “binanı dərhal bloklamağı” əmr edib
Musavat.com xəbər verir ki, Vaşinqtonda — Ağ Evə yaxın ərazidə baş verən silahlı hücum nəticəsində iki ABŞ Milli Qvardiyası hərbçisi güllələnib. Hadisədən sonra Ağ Ev fövqəladə rejimə keçirilib və bina qısa müddətdə bloklanıb. Prezident Donald Tramp həmin vaxt Floridada olub.
Qərbi Virciniya ştatının qubernatoru Patrik Morrisi X hesabında yazaraq bildirib ki, yaralanan iki hərbçi məhz onun ştatının Milli Qvardiya üzvləri olub. Ağ Ev də bu açıqlamanı repost edib.
Şübhəli saxlanılıb
Vaşinqton polisi şübhəli şəxsin saxlanıldığını və ərazinin təhlükəsizliyinin təmin edildiyini açıqlayıb. CNN-in məlumatına görə, hücumçu ağır yaralanıb və bunun, iki hərbçinin cavab atəşi nəticəsində baş verdiyi ehtimal olunur.
Tramp sosial şəbəkədə şübhəlini “heyvan” adlandırıb və ağır cəza veriləcəyini bəyan edib.
Hadisə mərkəzdə — Ağ Ev yaxınlığında baş verib
Atışma Ağ Ev yaxınlığında — ofis işçilərinin sıx olduğu, restoran və metro çıxışları ilə əhatələnmiş ərazidə baş verib. Şahidlər iki güclü partlayışa bənzər səs eşitdiklərini, insanların qaçaraq harasa sığınmağa çalışdığını bildiriblər.
Hadisə zamanı bütün federal təhlükəsizlik qurumları — Gizli Xidmət, Metropolitan Polis və Metro Polisi — genişmiqyaslı əməliyyata cəlb olunub.
Milli Qvardiya niyə Vaşinqtonda idi?
Milli Qvardiya bölmələri avqustdan etibarən Tramp administrasiyasının qərarı ilə paytaxta gətirilmişdi. Onların missiyası immiqrasiya və cinayətlə mübarizə çərçivəsində şəhərdə patrul aparmaq idi. Hazırda şəhərdə təxminən 2200 Milli Qvardiya hərbçisi xidmət aparırdı.
Hadisə ilə bağlı araşdırma davam edir.
Musavat.com
