Ədliyyə Nazirliyinin Penitensiar xidmətində gözlənilməz kadr dəyişikliyi olub. Vəzifələrinin icrası zamanı ciddi və kobud pozuntulara yol verdiklərinə görə Penitensiar xidmətin Daxili Təhqiqat şöbəsinin rəisi Fəqan Yaqubov və ədliyyə orqanlarının sərəncamında olan Altay Abdullayev ədliyyə sistemindən tamamilə xaric ediliblər.
Bu barədə müvafiq əmri ədliyyə naziri Fərid Əhmədov imzalayıb. Bu qərar təkcə 2 vəzifəli şəxsin taleyi ilə məhdudlaşmayıb, xidməti işinə məsuliyyətsiz yanaşan, vəzifələrini lazımi səviyyədə icra etməyən, fəaliyyətlərində digər ciddi nöqsanlara yol verən bir qrup penitensiar əməkdaşına qarşı da intizam tənbehi tədbirləri görülüb.
2023-cü ilin iyulundan Penitensiar xidmətə Mirsaleh Seyidov rəhbərlik edir. Onun vəzifəyə gəlişindən sonra cəzaçəkmə müəssisələrindəki narazılıqların müəyyən qədər azaldığı etiraf olunur. Lakin istintaq təcridxanalarında və cəzaçəkmə müəssisələrində saxlanma şəraiti, rüşvət, nəzarətçilərin qanundankənar davranışları ilə bağlı şikayətlər hələ də səngiməyib.
Bu tip şikayətlərin araşdırılması və günahkarların müəyyən edilməsi isə birbaşa Daxili Təhqiqat Şöbəsinin öhdəsinə düşür. Məhz buna görə həmin şöbənin rəisinin ədliyyə orqanlarından tam xaric edilməsi adi intizam tədbirindən qat-qat ağır addımdır və çox ciddi pozuntulara işarə edir.
Nazirlik rəsmi olaraq pozuntuların xarakteri barədə detala varmır. Amma hüquq mütəxəssisləri bildirirlər ki, adi nizam-intizam pozuntusuna görə əməkdaş xidmətdən xaric edilmir. Bu cəza yalnız korrupsiya və rüşvətə yol verilməsi, vəzifə səlahiyyətlərindən sui-istifadə, təhqiqat materiallarını gizlətmək və ya saxtalaşdırmaq, qanunsuz göstərişlər vermək və ya cinayət tərkibli hərəkətlərə şərait yaratmaq, məhkumlara və ya nəzarətçilərə münasibətdə qanunsuz müdaxilə hallarında baş verir.
Bu baxımdan ehtimal olunur ki, məsələ sadəcə nizam-intizamla bağlı deyil, yoxlanılan pozuntuların cinayət işi perspektivi də ola bilər.
Mövzu ilə bağlı “Yeni Müsavat”a açıqlama verən “Bakı” Hüquq Şirkətinin rəhbəri Natiq Ələsgərov deyib ki, Daxili Təhqiqat İdarəsi penitensiar sistemin ən həssas nöqtəsidir:
“Onların vəzifəsi məntəqə rəisləri, nəzarətçilər, operativ əməkdaşlar, eləcə də məhkumlarla bağlı daxil olan şikayətləri obyektiv araşdırmaqdır. Hər hansı müəssisədə rüşvət, işgəncə, təzyiq, kontrabanda və ya qanunsuz əməliyyat varsa, onun ilk ünvanı məhz Daxili təhqiqat olur. Burada korrupsiya və ya maraq konflikti varsa, bütün sistemi silkələyir”.
Natiq Ələsgərov deyib ki, bu, çox ağır sanksiyadır:
“Əgər nazir rəisi tam sistemdən çıxarırsa, deməli, pozuntu təkcə fəaliyyətsizlik yox, böyük ehtimalla ciddi hüquqazidd hərəkətlər olub. Belə hallarda intizam cəzası ilə kifayətlənmirlər. Araşdırma gedərsə, məsələ cinayət işinə qədər gedə bilər”.
Ekspertə görə, hazırda Ədliyyə Nazirliyi penitensiar sistemdə təmizləmə və modernləşmə prosesinə başlayıb:
“Bu çərçivədə rüşvət, “şəxsi şəbəkələr”, müəssisə daxilində qanunsuz alqı-satqı kanalları və daxili tənqid mexanizminin işləməməsi ciddi problemlər kimi ortaya çıxır. Daxili təhqiqat idarəsi bu korrupsion mexanizmlərdən hansına toxunub və ya hansısa prosesin üstünü örtüb – bu barədə rəsmi açıqlama yoxdur. Amma belə sərt cəza böyük pozuntuların olduğuna işarədir. Penitensiar xidmət uzun illərdir korrupsiya, şəraitin ağır olması, bəzi əməkdaşların məhkumlarla qeyri-insani davranışları kimi problemlərlə gündəmdədir. Daxili təhqiqat idarəsinin rəhbərinin “poqonunun sökülməsi” isə sistemdə görünməyən, köhnə qaydalarla işləmək istəyən qüvvələrlə yeni rəhbərliyin toqquşmasının göstəricisidir”. Natiq Ələsgərov hesab edir ki, proses hələ yekun deyil və yaxın vaxtlarda yeni detallar üzə çıxa bilər.
E.MƏMMƏDƏLİYEV,
Musavat.com
