ATƏT noyabrın 30-u Bakı vaxtı ilə 23:59-da Minsk prosesinin və ona bağlı bütün strukturların fəaliyyətini rəsmən dayandırdığını açıqlayıb.
Modern.az xəbər verir ki, bu barədə məlumat qurumun rəsmi saytında dərc olunub.
Qurum bildirir ki, prosesi bağlamaq üçün tələb olunan bütün inzibati prosedurlar yekunlaşıb. Bununla da ATƏT-in 1 sentyabr 2025-də qəbul etdiyi MC.DEC/1/25 saylı qərar tam icra olunub. Həmin qərar Ermənistan və Azərbaycanın ATƏT-in Finlandiya sədrliyinə ünvanladığı Birgə Müraciət əsasında qəbul edilmişdi.
ATƏT xatırladıb ki, bu addım 8 avqust 2025-də Vaşinqtonda Ermənistanın baş naziri Nikol Paşinyan və Azərbaycan Prezidenti İlham Əliyev tərəfindən imzalanmış Tarixi Birgə Bəyannamənin məntiqi davamıdır. Bəyannamə ABŞ Prezidenti Donald Trampın iştirakı ilə təsdiqlənmişdi və iki ölkə arasında yeni siyasi reallığın formalaşmasına gətirmişdi.
Minsk prosesinin bağlanması ilə ATƏT-də Qarabağ münaqişəsi üzrə ayrıca mexanizmə ehtiyac rəsmi şəkildə aradan qalxmış sayılır. Qurum öz açıqlamasında həm Azərbaycan, həm də Ermənistan tərəfindən konsensusla verilən qərarı regionda sülh prosesinin yeni mərhələsinə keçid kimi qiymətləndirib.
