Rusiya-Ukrayna müharibəsi səngiməyib, əksinə, daha da şiddətlənir. Rusiya mediasında isə Ukraynanın işğal olunmuş şəhərləri sanki “kreditə götürülür”.
Musavat.com xəbər verir ki, Moskvanın hələ noyabrda tam ələ keçirildiyini elan etdiyi üç yaşayış məntəqəsində döyüşlər şiddətlə davam edir.
Tramp komandası ilə son raund danışıqların qızğın çağında Putin və generalları cəbhədə böyük uğurlar barədə yorulmadan lovğalanır, bununla Vaşinqtonu təsirləndirməyi və Kiyevi kapitulyasiyaya sövq etməyi hədəfləyirdilər. Əslində isə təbliğatın “ələ keçirildi” deyib bayram etdiyi həmin üç şəhərin heç biri hələ ələ keçirilməyib.
Kupyansk
Gerasimov şəhərin ələ keçirildiyini Putinə demək olar üç həftə əvvəl – 20 noyabrda məruzə etmişdi. Baş Qərargah rəisinin yalanı hətta Z-yazarları belə hiddətləndirdi. Reallıqda isə bu gün Kupyanskda fəal döyüşlər gedir (DeepState xəritəsinə baxın). Ukrayna ordusunun bölmələri şəhərin mərkəzində fəaliyyət göstərir və Rusiya mövqelərinə hücum edir.
Pokrovsk
Onun ələ keçirilməsi barədə Gerasimov 30 noyabrda (9 gün əvvəl) raport vermişdi. Ukrayna silahlı qüvvələrinin 7-ci hücum korpusu komandanlığı şəhərin şimal hissəsinə hələ də nəzarət etdiklərini bildirir və bununla bağlı Ukrayna bayraqlı video da dərc olunub.
Volçansk
Gerasimov Volçanskin də 30 noyabrda ələ keçirildiyini elan etmişdi. Reallıqda isə şəhərin cənub kənarlarında döyüşlər davam edir. Ukrayna hərbçiləri bu istiqamətdə vəziyyətin çox çətin olduğunu etiraf edirlər. Z-yazarların fikrincə, bu temp davam etsə (Volçansk uğrunda döyüşlər bir ildən çoxdur davam edir), Xarkov vilayətinin tam alınmasına 10 il lazım gələr.
Son günlər Rusiya Müdafiə Nazirliyi bir neçə kəndin – Kuçerovka (Kupyanskin şərqində), Klinovoye və Bezimyannoye (Konstantinovka yaxınlığında) – ələ keçirildiyini elan edib. Lakin bunun heç bir təsdiqi yoxdur və belə dəyişikliklərin gizli qalması mümkün deyil, deyə CIT analitikləri bildirir.
CIT-in qurucusu Ruslan Leviyevin sözlərinə görə, bu cür “kredit bəyanatları” rus hərbçiləri üçün böyük problemdir:
“Onlar hər dəfə hansısa yaşayış məntəqəsinin guya ələ keçirildiyini eşidəndə, bunun həqiqət olmadığını bilirlər. Bu isə o deməkdir ki, həmin bəyanatı reallığa uyğunlaşdırmaq üçün onları təcili hücuma göndərəcəklər. Bu da yeni itkilər və intiharvari hücumlar deməkdir”.
Musavat.com
