Bakıda fəaliyyət göstərdiyi bildirilən Azərbaycan Sektor 6 Keşikçiləri Böyük Lojası adlı qapalı formatlı ezoterik cəmiyyətin ilk toplantısının yaxın günlərdə keçirildiyi qeyd olunur. Görüşün məhdud sayda iştirakçı ilə baş tutduğu və tədbir zamanı fotoşəkillərin çəkildiyi bildirilir.
Redaksiyamıza daxil olan məlumatlara əsasən, sözügedən lojaya dair daxili sənəd – “Bəyannamə” adlanan mətn mövcuddur. Sənəddə qurumun özünü ezoterik biliklərin qorunması, milli-mənəvi dəyərlərin yaşadılması və fərdi intizamın inkişafı üzərində formalaşan bir birlik kimi təqdim etdiyi görünür.
Araşdırma zamanı əldə edilən həmin bəyannamədə lojaya aid aşağıdakı yanaşmalar yer alır: “Biz – Azərbaycan Sektor 6 Keşikçiləri Böyük Lojası olaraq – ezoterik biliyin qorunmasını, milli-mənəvi dəyərlərin ucaldılmasını, elm və nizamın möhkəmləndirilməsini öz missiyamız kimi qəbul edirik.”
Sənəddə qeyd olunur ki, qurum fəaliyyətini qədim keşikçilik fəlsəfəsi, ezoterik biliklər və müasir elmi yanaşmalar üzərində qurduğunu bildirir. Eyni zamanda, lojaya üzv olan şəxslərin etik kodeks, şərəf, məsuliyyət və qardaşlıq prinsipləri əsasında öz üzərlərində işləməsi əsas öhdəliklərdən biri kimi göstərilir.
Diqqət çəkən məqamlardan biri isə bəyannamədə qurumun hər hansı siyasi və ya dini təşkilata bağlı olmadığının xüsusi vurğulanmasıdır. Sənəddə lojaya “qeyri-siyasi və qeyri-dini, mənəvi-ideoloji əsaslarla fəaliyyət göstərən birlik” kimi istinad edilir.
Bəyannamədə, həmçinin, Azərbaycanın suverenliyi, bütövlüyü və milli maraqlarına sədaqət prinsiplərinin əsas xətt kimi göstərildiyi qeyd olunur. Bu yanaşma, ezoterik yönümlü strukturlar üçün qeyri-adi sayılmasa da, regional kontekstdə diqqət çəkən detal kimi qiymətləndirilə bilər.
Müşahidəçilərin fikrincə, bu tip ezoterik birliklərin ilkin mərhələdə qapalı formatda fəaliyyət göstərməsi və məhdud informasiya ilə tanınması nadir hal sayılmır. Qurumun gələcəkdə daha açıq ictimai mövqe tutub-tutmayacağı isə zamanla bəlli olacaq.
