Yeni sənədlər, yeni mərhələ: Azərbaycan–Serbiya tərəfdaşlığı dərinləşir
Fevralın 15-də Belqradda Azərbaycan Respublikasının Prezidenti İlham Əliyev və Serbiya Respublikasının Prezidenti Aleksandar Vuçiçin iştirakı ilə Azərbaycan–Serbiya sənədlərinin mübadiləsi mərasimi keçirildi. İmzalanan saziş və memorandumlar iki ölkə arasında əməkdaşlığın artıq yalnız siyasi dialoqla məhdudlaşmadığını, konkret sahələr üzrə sistemli inkişaf mərhələsinə keçdiyini nümayiş etdirdi.
Bu fikirləri Vəhdət Partiyasının sədri Adəm İsmayıl Bakuvi bildirib. Onun sözlərinə görə, qida təhlükəsizliyi, energetika, iqtisadiyyat, media və kommunikasiya, mədəniyyət, idman, eləcə də tibbi sığorta sistemləri kimi geniş spektri əhatə edən sənədlər tərəfdaşlığın çoxşaxəli xarakter aldığını göstərir: “Xüsusilə Serbiya ərazisində qaz-turbin elektrik stansiyasının layihələndirilməsi, tikintisi və idarə olunmasına dair razılaşma enerji əməkdaşlığını strateji səviyyəyə yüksəldən mühüm addım kimi qiymətləndirilir.
Əslində, sonsənədlər iki ölkə münasibətlərinin məntiqi davamıdır. Azərbaycan ilə Serbiya arasında diplomatik münasibətlər 21 avqust 1997-ci ildə qurulub, 2010–2023-cü illər ərzində isə ümumilikdə 57 sənəd imzalanaraq möhkəm müqavilə-hüquq bazası formalaşdırılıb. Bu dövrdə iqtisadi əlaqələr də inkişaf edib, 2023-cü ildə iki ölkə arasında ticarət dövriyyəsinin artması əməkdaşlığın praktiki nəticələr verdiyini təsdiqləyib”.
Partiya sədri bildirir ki, Belqradda imzalanan yeni sənədlər isə mövcud bazanı keyfiyyətcə yeni mərhələyə daşıyır: “Prezidentlərin çıxışlarında vurğulanan əsas məqam – qarşılıqlı etimadın möhkəmlənməsi və uzun müddətli strateji tərəfdaşlıq niyyətidir. Bu yanaşma göstərir ki, Bakı və Belqrad münasibətləri regional enerji təhlükəsizliyi, investisiya axınları və humanitar əlaqələr baxımından daha geniş coğrafi əhəmiyyət qazanır”.
Şərhçi qeyd edir ki, sənədlərin sayının artması təkcə diplomatik fəallıq göstəricisi deyil. Bu, eyni zamanda iqtisadi inteqrasiyanın dərinləşməsi, birgə layihələrin genişlənməsi və tərəflərin bir-birini etibarlı tərəfdaş kimi qəbul etməsinin real sübutudur. Energetika, sənaye, sosial sahələr və humanitar istiqamətlər üzrə paralel əməkdaşlıq Azərbaycan–Serbiya münasibətlərini klassik ikitərəfli çərçivədən çıxararaq çox ölçülü strateji əməkdaşlıq modelinə çevirir.
Bütün bunlar onu göstərir ki, indiyədək formalaşmış hüquqi və siyasi baza yeni razılaşmalarla dahada möhkəmlənir. Prezidentlərin siyasi iradəsi və imzalanan sənədlərin məzmunu qarşıdakı illərdə əməkdaşlığın artan dinamika ilə davam edəcəyini deməyə əsas verir. Beləliklə, Belqrad görüşü Azərbaycan–Serbiya münasibətlərinin yalnız növbəti diplomatik epizodu deyil – tərəfdaşlığın genişlənən strateji mərhələsinin başlanğıcı kimi dəyərləndirilə bilər.
