“Tehran ABŞ ilə heç bir danışıqlar aparmayacaq”. “AzPolitika” xəbər verir ki, bunu İranın Ali Milli Təhlükəsizlik Şurasının katibi Əli Laricani sosial media hesabında yazıb. Onun sözlərinə görə, ABŞ Prezidenti Donald Tramp “İsrail ambisiyaları naminə Amerika əsgərlərini qurban verib”.
“Boş ümidlərlə idarə olunan Tramp regionu xaosa saldı və indi Amerika qoşunları arasında artan itkilərdən narahatdır. O, xəyalpərəst hərəkətləri ilə öz şüarı olan “Öncə Amerika ” şüarını “Öncə İsrail ” şüarına çevirib, İsrail ambisiyaları naminə Amerika əsgərlərini qurban verib və yeni yalan ifadələrlə bir daha şəxsiyyətə pərəstişin qiymətini Amerika əsgərlərinə və onların ailələrinə kəsir. Bu gün İran xalqı özünü müdafiə edir. Təcavüzü İran Silahlı Qüvvələri başlamayıb”, – Laricani yazıb.
Lakin İranın hazırkı olan-qalan rəhbərliyinin, o cümlədən Laricaninin özünün ABŞ ilə danışıqlar istədiyinə dair müxtəlif mənbələrdən məlumatlar daxil olmaqdadır. Məsələn, “Wall Street Journal” qəzeti öz mənbələrinə istinadla Əli Laricaninin ABŞ Prezidenti Donald Trampın administrasiyası ilə danışıqlar apardığını bildirilib. Nəşrin məlumatına görə, Laricani Oman vasitəsilə ABŞ ilə əlaqə saxlayıb və danışıqlar tələb edib.
Bundan öncə isə Donald Tramp NBC News-a deyib ki, İran rəsmiləri hazırda ABŞ tərəfi ilə danışıqlar aparır. Tramp danışıqlarda hansı İran rəsmilərinin iştirak etdiyini və ya hansı mövzuların müzakirə olunduğunu dəqiqləşdirməyib.
Göründüyü kimi, danışıqlar mövzusu ətrafında qeyri-müəyyənlik qalır. Yəqin ki, yalnız bombardmanların azalacağı, yaxud kəsiləcəyi təqdirdə, real danışıqların getdiyi məlum olacaq və bu danışıqların perspektivinə aydınlıq gələcək.
“AzPolitika.info”
