“Müasir beynəlxalq münasibətlər sistemi sürətlə dəyişir, yeni siyasi və iqtisadi güc mərkəzləri formalaşır, dövlətlərin qlobal proseslərdəki rolu isə təkcə hərbi və iqtisadi potensialla deyil, həm də onların etibarlılığı, strateji əhəmiyyəti və təşəbbüskarlıq qabiliyyəti ilə ölçülür. Belə bir mürəkkəb geosiyasi şəraitdə Azərbaycan artıq regionun deyil, bütövlükdə Avrasiya məkanının siyasi və iqtisadi balansına təsir edən mühüm aktorlardan birinə çevrilib. Cənab Prezident İlham Əliyevin iyulun 1-də Avropa Komissiyasının Prezidenti Ursula Fon der Lyayen ilə birgə mətbuata bəyanatı məhz bu reallığın siyasi manifesti kimi dəyərləndirilə bilər. Dövlət başçısının çıxışı göstərdi ki, Azərbaycan–Avropa İttifaqı münasibətləri artıq klassik enerji əməkdaşlığı çərçivəsini aşaraq yeni geosiyasi tərəfdaşlıq modelinə çevrilməkdədir.”
Cumhuriyyet.az xəbər verir ki, bu sözləri aia.az-a verdiyi açıqlamasında Vəhdət Partiyasının sədri, ictimai-siyasi xadim Adəm İsmayıl Bakuvi deyib.
Fikirlərini davam etdirən partiya sədri bildirib ki, bu gün Avropa ilə Azərbaycan arasında formalaşan münasibətlərin arxasında yalnız iqtisadi maraqlar deyil, dəyişən dünya düzəninin yaratdığı yeni zərurətlər dayanır: “Enerji təhlükəsizliyi, nəqliyyat marşrutlarının şaxələndirilməsi, yaşıl iqtisadiyyatın inkişafı və regional sabitlik məsələləri Azərbaycanı Avropa üçün əvəzolunmaz tərəfdaş statusuna yüksəldib. Əslində, Azərbaycanın geosiyasi çəkisinin artması uzunmüddətli və məqsədyönlü dövlət siyasətinin nəticəsidir. Son iyirmi il ərzində həyata keçirilən enerji strategiyası, beynəlxalq nəqliyyat layihələri və müstəqil xarici siyasət kursu ölkəmizi Avrasiya məkanının əsas bağlantı nöqtəsinə çevirib. Cənab Prezident İlham Əliyevin vurğuladığı kimi, Avropa İttifaqı ilə münasibətlərdə görünməmiş dinamika müşahidə olunur. Bu ilin müxtəlif aylarında Avropa İttifaqının ən yüksək səviyyəli rəhbərlərinin Bakıya səfərləri göstərir ki, Brüssel artıq Cənubi Qafqaz siyasətini Azərbaycan reallıqları üzərində qurmağa üstünlük verir. Bu yanaşmanın əsas səbəblərindən biri Azərbaycanın regionda sabitlik yaradan dövlət kimi çıxış etməsidir. Uzun illər davam edən münaqişənin başa çatdırılması və dövlət suverenliyinin tam bərpa olunması Cənubi Qafqazda yeni siyasi mühit formalaşdırıb. Artıq regionda təhlükəsizlik arxitekturası fərqli prinsiplər əsasında qurulur və bu prosesin əsas müəllifi Azərbaycandır. Dövlət başçısının bəyanatında xüsusi diqqət çəkən məqamlardan biri Ermənistan ilə münasibətlərin normallaşdırılması və sülh prosesinin real nəticələr verməsi ilə bağlı idi. Vaşinqtonda əldə olunmuş razılaşmalar və paraflanmış sülh sazişi bölgədə uzunmüddətli sabitliyin formalaşması üçün yeni imkanlar açır. Azərbaycanın birtərəfli qaydada həyata keçirdiyi humanitar və iqtisadi addımlar, o cümlədən tranzit məhdudiyyətlərinin aradan qaldırılması və enerji məhsullarının Ermənistana ixracı göstərir ki, Bakı regionun gələcəyini qarşıdurmada deyil, əməkdaşlıqda görür. Bu, əslində, yeni Cənubi Qafqaz modelinin əsas siyasi fəlsəfəsidir. Əgər keçmişdə bölgə böyük güclərin rəqabət meydanına çevrilirdisə, bu gün Azərbaycan onu əməkdaşlıq, qarşılıqlı maraqlar və iqtisadi inteqrasiya məkanına çevirmək istiqamətində mühüm addımlar atır. Avropa İttifaqının bu proseslərə müsbət münasibəti isə regionun gələcəyi ilə bağlı ortaq baxışların formalaşdığını göstərir. Brüssel üçün sabit və təhlükəsiz Cənubi Qafqaz enerji təhlükəsizliyi, logistika marşrutları və yeni iqtisadi imkanlar baxımından strateji əhəmiyyət daşıyır. Məhz buna görə də Azərbaycan Avropanın yeni geosiyasi xəritəsində xüsusi yer tutur. Bu gün Avropa İttifaqının enerji təchizatında Azərbaycanın payının artması yalnız iqtisadi göstərici deyil, həm də siyasi etimadın ifadəsidir. On Avropa ölkəsinin Azərbaycan qazından istifadə etməsi və bu coğrafiyanın genişlənməkdə davam etməsi ölkəmizin etibarlı tərəfdaş imicini daha da gücləndirir.”
Sonda müsahibimiz XXI əsr geosiyasətinin artıq yalnız enerji resursları üzərində qurulmadığını xüsusi vurğulayıb: “Yeni dövrün əsas meyarlarından biri də nəqliyyat-kommunikasiya imkanlarıdır. Bu baxımdan Azərbaycan Avrasiyanın əsas tranzit mərkəzlərindən birinə çevrilib. Şərq-Qərb və Şimal-Cənub dəhlizlərinin kəsişdiyi nöqtədə yerləşən ölkəmiz qlobal ticarət axınlarının mühüm iştirakçısıdır. Dünyada baş verən geosiyasi dəyişikliklər fonunda Orta Dəhlizin strateji əhəmiyyəti sürətlə artır və Azərbaycan bu marşrutun əsas təminatçısı rolunu oynayır. Bakı limanı, müasir dəmir yolu infrastrukturu və region dövlətləri ilə qurulan əməkdaşlıq platformaları ölkəmizi Avropa ilə Asiya arasında etibarlı körpüyə çevirib. Bu isə Azərbaycanın geosiyasi çəkisini daha da artıran mühüm amillərdən biridir. Cənab Prezident İlham Əliyevin bəyanatında toxunulan yaşıl enerji məsələləri isə gələcəyin siyasi və iqtisadi münasibətlərinin əsas istiqamətlərini müəyyənləşdirir. Azərbaycanın yaxın illərdə səkkiz giqavatlıq Günəş və külək enerjisi istehsal etməyi planlaşdırması ölkənin enerji strategiyasında yeni mərhələnin başlanğıcıdır. Bu, yalnız iqtisadi layihə deyil, həm də geosiyasi transformasiyanın tərkib hissəsidir. Çünki gələcəkdə yaşıl enerji resursları uğrunda rəqabət ənənəvi enerji bazarları qədər əhəmiyyətli olacaq. Azərbaycan isə bu proseslərdə də qabaqcıl mövqelərdən birini tutmağa hazırlaşır.
Bütün bunların fonunda aydın görünür ki, Azərbaycan–Avropa İttifaqı əməkdaşlığı yeni regional güc mərkəzinin formalaşmasına xidmət edir. Bu güc mərkəzi hərbi qarşıdurmaya deyil, iqtisadi tərəfdaşlığa, enerji təhlükəsizliyinə, nəqliyyat inteqrasiyasına və davamlı sülhə əsaslanır. Cənab Prezident İlham Əliyevin həyata keçirdiyi müstəqil və milli maraqlara söykənən xarici siyasət kursu nəticəsində Azərbaycan bu gün qlobal proseslərin passiv müşahidəçisi deyil, onların istiqamətini müəyyən edən əsas iştirakçılardan biridir. Cənubi Qafqazın gələcəyi də məhz bu yeni siyasi reallıqlar üzərində qurulur. Tarixin müxtəlif mərhələlərində böyük güclərin maraqlarının toqquşduğu bir coğrafiya olan Cənubi Qafqaz artıq yeni dövrə qədəm qoyur. Bu dövrün əsas siyasi ideyası isə Dövlətimizin Başçısının etdiyi kimi, ərazi iddialarından, münaqişələrdən və qarşıdurmalardan uzaq, əməkdaşlıq və tərəfdaşlıq regionunun formalaşdırılmasıdır. Məhz Azərbaycanın təşəbbüsləri və uzaqgörən siyasəti sayəsində Cənubi Qafqaz gələcəyin yeni geosiyasi əməkdaşlıq məkanına çevrilməkdədir” – deyə, Adəm İsmayıl Bakuvi fikirlərini tamamlayıb.
