Məlum olduğu kimi, bu gün 1 Avqust – Azərbaycan əlifbası və Azərbaycan Dili Günüdür. Bu əlamətdar günlə bağlı paylaşım edən Azərbaycanm Respublikasının Prezidenti İlham Əliyev dilimizin və müstəqilliyimizin önəminə diqqət çəkib:
“Bu gün 50 milyondan çox insan üçün Azərbaycan dili ana dilidir. Təmiz, saf, ədəbi Azərbaycan dilinin qoruyucuları bizik – müstəqil Azərbaycan dövləti”.
Maraqlıdır, Azərbaycan dilinin qorunması və inkişafı, eləcə də müstəqilliyimiz möhkəmlənməsində Azərbaycan ailələrinin, eləcə də vətəndaş cəmiyyəti institutlarının üzərinə hansı məsuliyyət düşür?
Moderator.az-a açıqlama verən “Modern İnkişaf və Ailə” İctimai Birliyinin sədri, Ulu Öndər Heydər Əliyev və Prezident İllham Əliyevlə bağlı çoxsaylı kitabların müəllifi Zərifə Quliyeva mövzu ilə bağlı maraqlı fikirlər səsləndirib: “Hər şeydən öncə qeyd edim ki, Azərbaycan Respublikasının Prezidenti İlham Əliyevin Azərbaycan Əlifbası və Azərbaycan Dil Günü ilə bağlı paylaşımı Müzəffər Ali Baş Komandanın dilimizə və müstəqilliyimizə verdiyi önəmi göstərir. Cənab Prezident dilimizin on milyonlarla soydaşımızın həyatında oynadığı rolu vurğulamaqla yanaşı, müstəqil Azərbaycan dövlətini bu dilin qoruyucusu adlandırır. Həqiqətən də, tariximizə nəzər salsaq görərik ki, Azərbaycan məhz müstəqillik dönəmində bütün mənəvi sərvətləri kimi, doğma ana dilinin qorunması və inkişafı istiqamətində daha fundamental addımlar atıb, böyük işlər görüb. Azərbaycan dilinə ən böyük qayğını isə Azərbaycan xalqının Ümummilli Lideri Heydər Əliyev göstərib. Azərbaycan dilini Azərbaycan xalqının ən böyük milli sərvəti adlandıran Ulu Öndər, dilimizin qorunması, inkişafı uğrunda əsl fədakarlıq sərgiləyib, tarixi uğurlara imza atıb. Heydər Əliyev deyirdi: “İnkişaf etmiş zəngin dil mədəniyyətinə malik olan xalq əyilməzdir, ölməzdir, böyük gələcəyə malikdir. Ona görə də xalqımıza ulu babalardan miras qalmış bu ən qiymətli milli sərvəti hər bir Azərbaycan övladı göz bəbəyi kimi qorumalı, daim qayğı ilə əhatə etməlidir. Bu onun müqəddəs vətəndaşlıq borcudur”.
Bu sözlər Ulu Öndər Heydər Əliyevin ana dilimizə, onun təmizliyinin, saflığının qorunmasına necə böyük önəm verdiyini göstərir. Qqürurvericidir ki, Ulu Öndər irsini uğurla davam etdirən Prezident İlham Əliyev də Azərbaycan dilinin qorunmasını daim diqqət mərkəzində saxlayıb, onun təbliği və inkişafına xüsusi qayğı ilə yanaşıb”.
Təşkilat sədri bu məsələdə ailələrin üzərinə düşən məsuliyyətə də diqqət çəkib: “Azərbaycan dilinin qorunması və inkişafında ailələrin də üzərinə böyük məsuliyyət düşür. Çünki uşaq ana dilini ilk olaraq ailəsində eşidir. Onda dilə sevgi və ehtiram ilk növbədə ailədə formalaşır. Buna görə də ailələrin dilə münasibəti, onların ana dilini uşağa sevdirmək bacarığı bu məsələdə mühüm rol oynayır. Ona görə də valideynlər hələ körpə yaşlarından uşaqlarda ana dilinə sonsuz sevgi və məhəbbət yaratmağı bacarmalı, dilin əhəmiyyətini onlara düzgün izah etməlidirlər. Uşaqlar anlamalıdır ki, ana dili ünsiyyət vasitəsi olmaqla yanaşı, həm də xalqımızın və dövlətimizin milli özünəməxsusluq göstəricisi, tarixi irsə sadiqlik rəmzidir”.
Zərifə Quliyeva QHT-lərin də ana dilinin təbliği və müstəqilliyimizin möhkəmlənməsində yaxından iştirakının vacib olduğunu qeyd edib: “Azərbaycan dilinin saflığının qorunması, müstəqilliyimizin daha da möhkəmlənməsi QHT-lərin, vətəndaş cəmiyyət institutlarının da fəaliyyətində əsas istiqamətlərdən biri olmalıdır. QHT-lərimiz bununla bağlı təhsil müəssisələrində – məktəb və institutlarda müxtəlif layihələr həyata keçirməli, uşaq və gənclərin iştirakı ilə tədbirlər təşkil etməlidir. Ulu Öndər Heydər Əliyev və Prezident İlham Əliyevin ana dili və müstəqilliklə bağlı çağırışlarının uşaq və gənclərə çatdırılması, onların bu ideyaların tətbiqinə həvəsləndirilməsi xüsusilə faydalı olar.
Məlumat üçün qeyd edim ki, biz “Modern İnkişaf və Ailə” İctimai Birliyi olaraq ana dilimiz, eləcə də digər milli-mənəvi dəyərlərimizin təbliği ilə bağlı çoxsaylı tədbirlər həyata keçirmiş, bir sıra layihələr gerçəkləşdirmişik. Şəhid ailələri və veteranların iştirakı ilə vətənpərvərlik tədbirlərinin keçirilməsi, yazı müsabiqələrinin təşkili, işğaldan azad olunan torpaqlara edilən səfərlər və s. uşaq və gənclərdə həm ana dilimizə, həm də müstəqilliyimizə olan sevgi və ehtiramın artırılmasına xidmət edir. Əminliklə bildirirəm ki, milli-mənəvi dəyərlərimizin təbliği bundan sonra da təşkilatımızın fəaliyyətinin əsas istqiamətlərindən biri olacaq, yaxın gələckdə bu müstəvidə bir-birindən maraqlı layihələrə imza atacağıq”.
Seymur ƏLİYEV
