Gənc ssenarist Elvin Məcidlinin ilk tammetrajlı film ssenarisi ölkə səviyyəli ssenari müsabiqəsində uğur qazanıb. Müəllifin “Akvarium” adlı əsəri münsiflər heyəti tərəfindən yüksək qiymətləndirilərək “Ailə içi münasibətlərin uşaq baxışından həssas təsvirinə görə” diplomuna layiq görülüb.
13 avqust 2000-ci il təvəllüdlü Elvin Məcidli Azərbaycan Dövlət Mədəniyyət və İncəsənət Universitetinin Kino və Televiziya fakültəsinin Ssenaristlik (Bədii yaradıcılıq) ixtisası üzrə məzunudur. Yaradıcılıq fəaliyyətinə qısametrajlı filmlərlə başlayan gənc müəllif qısa müddətdə özünəməxsus baxış bucağı və fərqli üslubu ilə diqqət çəkməyi bacarıb. O, müxtəlif film festivallarında uğur qazanaraq bir sıra mükafatlara layiq görülüb.
Gənc yaşına baxmayaraq, Elvin Məcidli ssenari, reklam və rəqəmsal məzmun sahəsində formalaşan yaradıcı simalardan biri kimi tanınır. Onun işlərində insan psixologiyasına həssas yanaşma, gündəlik həyat hadisələrini fərqli rakursdan təqdim etmək bacarığı və emosional dərinlik xüsusi diqqət çəkir.
Hazırda Elvin Məcidli kontent kreator, ssenarist və kopirayter kimi fəaliyyət göstərir. Reklam, sosial media və bədii kino sahələrində müxtəlif layihələrin müəllifi olan gənc yaradıcı üçün “Akvarium” həm ilk tammetrajlı film ssenarisi, həm də peşəkar kino yaradıcılığında yeni mərhələnin başlanğıcı hesab olunur.
Emosional dərinliyi, dramatik və komedik elementləri üzvi şəkildə birləşdirən “Akvarium” ailədaxili münasibətləri uşaq baxış bucağından təqdim etməsi ilə seçilir. Məhz bu yanaşma ssenarinin münsiflər tərəfindən yüksək qiymətləndirilməsində mühüm rol oynayıb. Müəllif gələcəkdə bu ssenarinin tammetrajlı bədii film kimi ekranlaşdırılacağına inanır.
İlk tammetrajlı ssenarisi ilə qazandığı bu uğur Elvin Məcidlinin yaradıcılıq yolunda mühüm mərhələ hesab olunur. Bu nailiyyət onun istedadının və zəhmətinin göstəricisi olmaqla yanaşı, gələcəkdə Azərbaycan kinosuna yeni və yaddaqalan ekran əsərləri qazandıracağına dair gözləntiləri də artırır.
