Sabiq MTN şefi Eldar Mahmudov dönəmində bir sıra ağır cinayətlərin törədildiyi, iş admlarına qarşı münasibətlərdə ciddi özbaşınalıqlara yol verildiyi məlumdur. Eldar Mahmudov dəstəsinin böyük əksəriyyətinin “MTN olayları”ndan sonra həbs edilməsi, digər qisminin isə vəzifədən uzaqlaşdırılması bu həqiqətin ən böyük isbatıdır.
Məlumat üçün qeyd edək ki, “MTN olayı”ndan dərhal sonra Eldar Mahmudovun bəzi yaxınları – İlqar Mahmudov və digərləri ilə bağlı ölkə mediasında bir sıra məlumatlar yayılsa da, sonradan bu şəxslərlə bağlı yeni məlumatlara rast gəlinmədi. Hüquq-mühfizə orqanlarının da Eldar Mahmudovun yaxın çevrəsi ilə bağlı ciddi araşdırmalar aparacağı ilə bağlı gözləntilər də, təəssüf ki, özünü doğrultmadı. Halbuki, sabiq nazirin yaxın ətrafının bu gün də həm ölkə daxilində, həm də uzaq xaricdə aktiv bizneslə məşğul olduğu, o cümlədən, tikinti biznesi həyata keçirdiyi ilə bağlı məlumatlar mövcuddur. İnsanları düşündürən ən böyük sual isə budur: Sabiq nazirin yaxın çevrəsi milyonlarla manat dəyərində olan biznesi hansı pullarla qurub? Niyə bu pullaırn mənbəyi ilə bağlı əlaqədar instansiyalar tərəfindən hər hansı araşdırma aparılmır?
Ümid edirik ki, yaxın vaxtlarda güc orqanları xalqın bu istiqamətdəki gözəntiləri ilə bağlı müvafiq addımlar atacaq, Eldar Mahmudovun yaxın əhatəsinin malik olduğu sərvətlər, bu sərvətlərin hansı yolla əldə edilməsi ilə bağlı ciddi faktlar ortaya qoyacaqlar.
Bir məqamı da qeyd edək ki, Eldar Mahmudov və yaxın çevrəsinin özbaşınalığından ən çox əziyyət çəkən sahibkarlar olub. Eldar Mahmudovun zavalına gələn xeyli sayda sahibkarın pulu əlindən alınıb, onların biznesinə ağır zərbə vurulub. Hansı ki, onların bir çoxuna dəyən zərər hələ də ödənilməyib. Halbuki, qanun da, ədalət də bu problemin həllini zəruri edir.
Yəqin ki, bütün digər problemlər kimi, bu problem də dövlətimizin qayğısı və diqqəti sayəsində öz həllini tapacaq, haram pullar hesabına özlərinə cah-cəlal yaradan şəxslərin əmlakı uzun illərdir ki, haqq-ədalət gözləyən sahibkarların xeyrinə müsadirə ediləcək.
