Zaman-zaman Azərbaycanın əleyhinə açıq informasiya kampaniyalarının şahidi olmuşuq. Xüsusilə suveren hüquqlarımızı tam bərpa etdikdən sonra ölkəmizə qarşı həqiqətləri təhrif edən, qərəz və qarayaxma üzərində qurulan kampaniyaların intensivləşməsi diqqət çəkir. Bəzi Qərb media resursları bu prosesdə xüsusi canfəşanlıq göstərərək Azərbaycanda baş verən hadisələri obyektivlikdən uzaq təqdim etməyə çalışır.
Goranboyda baş verən yanğınla bağlı Polşanın “Nexta” kanalının məsələni məsuliyyətsiz və həqiqətdən uzaq formada təqdim etməsi də həmin yanaşmanın növbəti nümunəsidir. Hadisənin mahiyyətini araşdırmadan, faktları dəqiqləşdirmədən, yalnız birtərəfli yanaşma əsasında Azərbaycan əleyhinə manipulyativ informasiya yaymaq jurnalistikanın fundamental prinsiplərinə ziddir.
Azərbaycanın müstəqil siyasəti, milli iradəyə əsaslanan qərarları, regional mövqelərinin möhkəmlənməsi və beynəlxalq nüfuzunun artması müəyyən dairələrdə ciddi narahatlıq yaradır. Burada əsas hədəf Azərbaycan haqqında mənfi rəy formalaşdırmaq, ictimai təsəvvürləri manipulyasiya etmək və ölkəmizin əldə etdiyi nəticələrə kölgə salmaqdır.
Səbəb əslində çox sadədir, Azərbaycan qüdrətli dövlətdir, öz standartlarını formalaşdırır, regionda söz sahibidir. Ölkəmizdə mövcud olan Lider–Xalq birliyi Azərbaycanı istəməyən dairələrin ürəyincə deyil. Prezident İlham Əliyevin qlobal lider kimi qəbul olunması, beynəlxalq müstəvidə artan nüfuzu və siyasi iradəsi həmin dairələrin rahatlığını pozur. Azərbaycanın müstəqil yolu, milli maraqlara söykənən qətiyyətli siyasəti və artan regional çəkisi bu narahatlığı daha da dərinləşdirir. Ölkəmizin əleyhinə sifarişlə yazılan belə qərəzli materiallar həmin narahatlığın informasiya müstəvisindəki ifadəsidir. Həqiqəti təhrif etməklə Azərbaycanın gücünü kölgədə saxlamaq isə mümkün deyil. Çünki reallığın ən böyük sübutu Azərbaycanın əldə etdiyi nəticələrdir.
Bütün bunlar başa düşüləndir. Azərbaycanın liderinin qlobal nüfuzu həmin dairələri, eləcə də milli maraqlarımıza qarşı mövqe tutan qüvvələri eyni mövqedə birləşdirir. Onların informasiya hücumlarının əsas məqsədi Azərbaycan reallığını kölgələmək, cəmiyyətin dövlətə olan inamına xələl gətirmək və ölkəmizin qazandığı tarixi nəticələri kiçiltməkdir. Amma heç nəyə nail olmayacaqlar. Çünki Azərbaycanın gücü xalqın öz Liderinə və dövlətinə olan möhkəm inamından qaynaqlanır. Birlik və həmrəylik qarşısında heç bir qüvvə Azərbaycan həqiqətlərinin qarşısını ala bilməz. Bu, həm də gücün yaratdığı qorxudur. Görünür qüdrətimiz çoxlarını narahat edir.
Rəşad Mahmudov,
YAP İdarə Heyətinin üzvü
