2020-ci ilin sentyabrın 27-də Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu Ermənistan silahlı qüvvələrinin hərbi təxribatlarının, döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə bütün cəbhəboyu əks-hücum əməliyyatlarına başladı. Belə ki, həmin gün Ermənistanın növbəti irimiqyaslı təxribatlara başlamasına, Azərbaycan Ordusunun mövqelərinə və mülki yaşayış məntəqələrinə atəş zərbələri endirməsinə cavab olaraq əks-hücum əməliyyatı işə düşüb, sonradan “Dəmir yumruq” adını alan bu əməliyyat Vətən müharibəsinə çevrildi. 44 günlük Vətən müharibəsi dövründə Prezident, Ali Baş Komandan İlham Əliyev xalqa müntəzəm müraciətlər etdi. Bu müraciətlər Azərbaycan xalqını ayağa qaldırdı, onu yumruq kimi sıx birləşdirdi, müharibənin gedişatına və taleyinə güclü təsir göstərdi. Hər bir müraciət növbəti qələbələrin müqəddiməsinə çevrildi.
Sentyabrın 27-si Azərbaycanda Anım Günüdür. Prezident İlham Əliyevin 2020-ci il 2 dekabr tarixli Sərəncamına əsasən təsis edilən Anım Günü Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarından keçmiş əsgər və zabitlərimizə, bütün şəhidlərimizə dərin ehtiramın ifadəsidir.
27 Sentyabr – Anım Günü ilə əlaqədar Qazax rayonunda da şəhidlərimizin xatirəsinə həsr olunmuş silsilə tədbirlər təşkil olunur.
Sentyabrın 26-da Qazax Rayon İcra Hakimiyyətinin təşkilatçılığı ilə 27 Sentyabr – Anım Günü ilə əlaqədar ağacəkmə aksiyası keçirilib.
Aksiyada Qazax Rayon İcra Hakimiyyəti başçısının birinci müavini Məmməd Alıyev, icra aparatının məsul əməkdaşları, Qazax Rayon İcra Hakimiyyəti yanında Gənclərin Yerli Məşvərət Şurasının üzvləri, könüllülər iştirak ediblər.
Azərbaycanın ərazi bütövlüyü uğrunda canını qurban vermiş 27 Sentyabr – Vətən müharibəsi şəhidlərinin anım gününə ehtiram əlaməti olaraq təşkil edilən bu aksiya zamanı rayonun Xanlıqlar kəndi ərazisində 300 ədəd eldar şamı, şəhərin Heydər Əliyev parkında, Fəxri Qazaxlılar parkında, Şəhidlər Xiyabanında və “Qarabağ Azərbaycandır!” Abidə Kompleksində 250 ədəd gül kolları əkilib.
Qazax Rayon İcra Hakimiyyəti yanında Gənclərin Yerli Məşvərət Şurasının üzvləri hər zaman olduğu kimi, bu dəfə də nümunəvi addımları ilə seçiliblər. Gənclər bu dəfə 27 Sentyabr – Anım Günü ilə əlaqədar keçirilən ağacəkmə aksiyasında iştirak etməklə kifayətlənməyiblər. Onlar həm də Şəhidlər Xiyabanında şəhidlərimizin şəkli əks olunmuş lövhələri silərək, xiyabanda təmizlik işləri apararaq igid Vətən oğullarına olan sosnuz ehtiramlarını bildiriblər.
Şəhidlər Xiyabanı
Xanlıqlar kəndinin ərazisi
Fəxri Qazaxlılar parkı
“Qarabağ Azərbaycandır!” Abidə Kompleksi
