Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin “Dilimiz milli-mədəni kimliyimizin təməlidir” mövzusunda həyata keçirdiyi silsilə seminarlar davam edir. Layihənin əsas məqsədi “Azərbaycan Mədəniyyəti – 2040” Konsepsiyası əsasında Azərbaycan dilinin milli mədəniyyətdəki rolunun və mövqeyinin daha da möhkəmləndirilməsi, mediada Azərbaycan dilindən düzgün və səlis istifadənin təşviq edilməsi, eləcə də bu istiqamətdə maarifləndirmə və dil savadlılığının artırılmasına dəstək göstərməkdir. Layihə çərçivəsində 8 oktyabr 2026-cı il tarixində Azərbaycan Milli Kitabxanasında keçirilən ikinci seminarda məruzəçi Xalq şairi, yazıçı, ictimai xadim Sabir Rüstəmxanlı olub.
Mərkəzin sektor müdiri Fariz Yusiflinin moderatorluğu ilə keçirilən seminarda ilk olaraq Azərbaycan Milli Kitabxanasının direktoru professor Kərim Tahirov çıxış edərək bildirib ki, dövlət başçısının müvafiq Sərəncamı ilə təsdiq edilmiş “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyası ölkəmizin mədəni siyasətinin gələcək onilliklər üzrə strateji istiqamətlərini müəyyənləşdirən mühüm sənəddir. Konsepsiya yalnız bu günü deyil, gələcək nəsillərin mədəni düşüncə və estetik zövqünün formalaşmasını da hədəfləyən uzaqgörən bir baxışın ifadəsidir.
Daha sonra Xalq Şairi Sabir Rüstəmxanlı “Dilimiz milli-mədəni kimliyimizin təməlidir” mövzusunda məruzə ilə çıxış edərək Azərbaycanın müstəqillik tarixindən və inkişaf yolundan danışıb. S.Rüstəmxanlı çıxışında bildirib ki, dil də mənəvi ekologiyadır: “Necə ki, havanın, dünyanın atmosferinin təmizliyi qorunur, eləcə də dilin təmizliyi qorunmalıdır. Dil də əgər çirklənsə, saflığı qorunmazsa, o da öz “sağlamlığını”, yaşamaq gücünü, yaşamaq qabiliyyətini itirər. Məsələ bu qədər bəsit və sadədir.
Hər bir dilin öz qanunauyğunluğu var. Hər millətin dili onun tarixinin, keçmişinin və bugünkü yaşam tərzinin ümumi bir parçası kimi yaranıb və elə həmin şəkildə də qorunmalıdır”. Məruzəçi qeyd edib ki, dilin zənginləşməsi təbii proses kimi getməlidir. Bu gün dünya ölkələri arasında münasibətlər sıxlaşıb, texnologiyada, sənayedə inteqrasiya, qarşılıqlı zənginləşmə necə gedirsə, dillərdə də buna bənzər proses gedir. “Bu prosesdə üstünlük ilk növbədə eyni kökdən gələn türk dillərinə verilməlidir. Qohum dillərin bir-birini zənginləşdirməsi daha sağlam və təbii yoldur. Kənar dillərdən daxil olan sözlərə isə mümkün qədər Azərbaycan dilində qarşılıq tapılmalı, dilin öz imkanlarına üstünlük verilməlidir”, – deyə Sabir Rüstəmxanlı vurğulayıb. Xalq şairi xatırladır ki, onun bütün yaradıcılığı dilimizin saflığı və sağlamlığı uğrunda mübarizədə keçib: “Sağ ol, Ana dilim!” adlı bir kitabım var. O kitabı yazanda Bakıda rəsmi dairələrdə, tribunalarda Azərbaycan dilində danışıq, çıxış demək olar ki, yox idi. Dil daha çox dar, məhdud məişət səviyyəsində işləyirdi. Ömrüm boyu dil uğrunda mübarizə mənim əsas işlərimdən biri olub, bu mövzuda onlarla məqaləm, çıxışım var”. Sonda məruzəçi iştirakçıların suallarını cavablandırıb və dilimizin qorunması ilə bağlı fikir mübadiləsi aparılıb.
Tədbirdə Beynəlxalq Muğam Mərkəzinin solisti xanəndə Hüseyn Məlikovun iştirakı ilə muğam üçlüyü, aşıq Əli Zeynalovun ifaları dinlənilib, bədii qiraətçi Hüseynağa Aslanovun Xalq Şairinin “Sağ ol, ana dilim” şerini səsləndirib.
