İyunun 13-də Qazax Rayon İcra Hakimiyyəti və Qazax Rayon Mədəniyyət müəssisələrinin birgə təşkilatçılığı ilə 15 İyun – Milli Qurtuluş Gününə həsr edilmiş “Qurtuluşun əbədi müəllifi” adlı tədbir keçirilib.
Qazax Rayon Mədəniyyət Mərkəzinin qarşısında keçirilən tədbirdə Qazax Rayon İcra Hakimiyyətinin başçısı Rəcəb Babaşov, icra aparatının məsul şəxsləri, Yeni Azərbaycan Partiyası Qazax Rayon Təşkilatının sədri Anar Nəbiyev, rayonun hüquq-mühafizə orqanlarının rəhbərləri, sərhədçilər, şəhid ailələri, qazilər, Bakı Dövlət Universitetinin Qazax filialının, Qazax Dövlət Sosial-İqtisadi Kollecin müəllim və tələbələri, təhsil, mədəniyyət, səhiyyə işçiləri, Qazax Rayon İcra Hakimiyyəti yanında Gənclərin Yerli Məşvərət Şurasının üzvləri, KİV nümayəndələri iştirak ediblər.
Tədbirdə Azərbaycan Respublikasının Dövlət Himni səsləndirilib. Ümummilli Lider Heydər Əliyevin və Vətən uğrunda canlarından keçmiş şəhidlərin əziz xatirəsi birdəqiqəlik sükutla yad edilib. Tarixi günləri bir daha xatırlamaq üçün Ulu Öndər Heydər Əliyevin dövlətimiz və xalqımız haqqında səsləndirdiyi dəyərli fikirləri dahi şəxsiyyətin öz səsi ilə səsləndirilib.
Tədbirin aparıcıları, Qazax Dövlət Dram Teatrının aktyorları Yusif Qoca və Zəmanə Dərviş çıxış edərək tədbir iştirakçılarını 15 İyun – Milli Qurtuluş Günü münasibətilə təbrik edib, səmimi ürək sözlərini bölüşüblər. Qeyd olunub ki, bugünkü tədbir 15 İyun – Milli Qurtuluş Gününə həsr olunub. İllər bundan əvvəl Azərbaycan xalqının başı üzərini qara buludlar alanda, dövlətimiz müstəqilliyini itirmək təhlükəsi ilə üz-üzə qalanda Heydər Əliyev xalqın çağırışına səs verərək ölkəmizi bəlalardan, müsibətlərdən xilas etdi. Xalqımızı nicata aparan yol məhz həmin gündən başlandı.
Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını salamlayıb, 15 İyun – Milli Qurtuluş Günü münasibətilə səmimi təbriklərini, ürək sözlərini çatdırıb. İcra başçısı bildirib ki, dövlətçilik salnaməmizdə silinməz izlər qoymuş, azərbaycanlı olması ilə ömür boyu fəxr etmiş, milli qürur və iftixar mənbəyimiz olan Heydər Əliyev bütün dünyada Azərbaycanın rəmzi kimi qəbul edilir. Bütün şüurlu həyatını canından artıq sevdiyi xalqına, Vətəninə həsr etmiş müdrik dövlət xadimi Ulu Öndər Heydər Əliyevin adı tariximizə həm də müstəqilliyimizin memarı, yeni Azərbaycanın banisi kimi yazılıb. Bildiyimiz kimi, 1991-1993-cü illər ərzində suverenliyimiz real təhdidlər qarşısında qalmış, dövlətin müstəqilliyinə və suverenliyinə təhdid yaradan bütün amillər ölkəmizdə yaşanmışdır. 1993-cü ildə respublikada artıq həyatın bütün sahələrini böhran bürümüşdü. Hakimiyyət daxilində qruplaşmalar yarandı və birincilik uğrunda biri-birinə qarşı mübarizə aparıldı. Beləliklə, AXC-Müsavat cütlüyünün bir illik hakimiyyəti ölkədə anarxiya, xaos, yaratmaqla sonda torpaqların işğalı ilə nəticələndi. Yeganə ümid və çıxış yolunu axtaran Azərbaycan xalqı xilasını yalnız Heydər Əliyevin simasında görürdü. Ölkədə təhlükəli proseslərin qarşısını ala bilmədiyini dərk edən AXC-Müsavat cütlüyü sonda Heydər Əliyevdən imdad istədi. 1993-cü il iyunun 9-da Ulu Öndər Heydər Əliyev xalqın və respublikanın hakim dairələrinin təkidli dəvətini qəbul edib Bakıya gəldi. Heydər Əliyev doğma Vətənin xilası naminə misilsiz fədakarlıq nümayiş etdirmiş, ölkəmizin ictimai-siyasi pərakəndəliyinə və anarxiyaya son qoydu, dövlətin dayanıqlı inkişaf yolunu müəyyən etdi. 15 İyun – Milli Qurtuluş Günü Azərbaycan tarixinə qızıl hərflərlə yazılmış taleyüklü əhəmiyyəti olan günlərdən biridir. Ümummilli Lider Heydər Əliyevin adı ilə bağlı olan Milli Qurtuluş Günü Azərbaycan tarixinin şanlı qürur səhifəsinə çevrildi. Rayon rəhbəri vurğulayıb ki, Ulu Öndərin əbədi və unudulmaz xidməti çox böyükdür. Diqqət yetirdikdə görürük ki, Ulu Öndərin tarixi missiyası üç mühüm amilə söykənirdi. Xalqın Heydər Əliyevə olan möhkəm, sarsılmaz inamı və dəstəyi, Heydər Əliyev şəxsiyyətinin böyüklüyü, qüdrəti, əzəməti, Heydər Əliyevin mənsub olduğu Azərbaycan xalqına, Vətəninə sonsuz və təmənnasız sevgisi olmuşdur. 1993-2003-cü illərdə Azərbaycanın sürətli inkişafı bugünkü reallıqların bünövrəsidir. Həmin illərdə görülmüş işlər sayəsində Azərbaycan inkişaf yoluna qədəm qoydu, dünyada böyük hörmətə malik oldu. Ölkə daxilində başlanan islahatlar dövlətimiz üçün həlledici rol oynadı. Bu gün müasir Azərbaycan Ulu Öndər Heydər Əliyevin görmək istədiyi azad, müstəqil, ərazi bütövlüyü və suverenliyi tam təmin olunmuş Azərbaycandır. Ulu Öndər Heydər Əliyevin torpaqlarmızın işğaldan azad olunması arzuları 27 ildən sonra reallaşdı, Prezident İlham Əliyev ata vəsiyyətini yerinə yetirdi. Bu gün Şuşada, Laçında, Ağdamda, Füzulidə, Cəbrayılda, Zəngilanda, Qubadlıda, Kəlbəcərdə, Xankəndində üçrəngli bayrağımız əzəmətlə dalğalanır. Prezident, Müzəffər Ali Baş Komandan İlham Əliyev azad edilmiş torpaqlarda infrastruktur layihələrinin təməlini qoyur, Böyük Qayıdışın reallaşdırılması istiqamətində təxirəsalınmaz tədbirlər həyata keçirir. Xalqımız əmindir ki, Prezident İlham Əliyevin rəhbərliyi ilə daha uca zirvələr fəth ediləcək, düşmənin yerlə-yeksan etdiyi Qarabağ dünyanın ən gözəl guşələrindən birinə çevriləcək. Xalqımız Ulu öndərin əziz xatirəsini həmişə uca tutur və minnətdarlıqla anır.
Qazax şəhər Səməd Vurğun adına 2 nömrəli tam orta ümumtəhsil məktəbin 7-ci sinif şagirdi Banu Səmədli və 3-cü sinif şagirdi Əli Səmədli Ulu Öndərə və müstəqil Azərbaycanımıza həsr olunmuş şeir səsləndiriblər.
Sonra tədbir konsert proqramı ilə davm etdirilib. Gənc ifaçılar Nicat Zeynallı “Zəfərin mübarək, Vətən”, Gülnar Mədətova “Möhtacam”, Vüsal Osmanlı “Ey Vətən”, Nəsimi Kamaloğlu “Səndən qəşəngi yoxdu”, Nəsimi Kamaloğlu və Zəmanə Dərviş “Ölərəm sənin üçün”, Məhəmməd Budaqov “Dalğalansın bayrağımız” adlı mahnı töhfələri ilə tədbirə xoş ovqat bəxş ediblər.
Aşıq Camoy Qurbanov sazda ifa etdiyi musiqi töhfəsi ilə bayram tədbirinə rəng qatıb. “Zəfər” ritm qrupunun təqdim etdiyi “Cəngi” havası alqışlarla qarşılanıb.
