Sentyabrın 11-də MDB İcraiyyə Komitəsinin təşkilatçılığı ilə üzv dövlətlərin 2035-ci ilədək yanacaq-energetika kompleksinin inkişafı üzrə toplantısına Azərbaycan nümayəndə göndərməyib. Maraqlıdır ki, bəzi ölkələr online formatda tədbirdə iştirak etsə də, Azərbaycan buna da ehtiyac görməyib.
Musavat.com xəbər verir ki, tədbirdə Ermənistan, Belarus, Qazaxıstan, Qırğızıstan, Rusiya, Tacikistan və Özbəkistan nümayəndələri iştirak edib. O cümlədən, MDB Elektroenergetika Şurasının İcraiyyə Komitəsi, Avrasiya İqtisadi Komissiyası, MDB İcraiyyə Komitəsinin nümayəndələri də toplantıya qatılıblar. Azərbaycan nümayəndəsinin niyə iştirak etmədiyi haqda heç bir izahat verilməyib.
Müzakirəyə çıxarılan sənəd sənayenin inkişafı üçün MDB-yə üzv dövlətlərin səylərinin əlaqələndirilməsi üçün mexanizmlərin formalaşdırılmasına yönəlib.
İclas iştirakçıları təqdim olunan təklifləri nəzərdən keçirib və ortamüddətli perspektivdə sənayenin birgə davamlı, proqnozlaşdırıla bilən və qarşılıqlı faydalı inkişafına yönəlmiş əsas yanaşmaları dəstəkləyiblər. MDB nümayəndələri milli enerji şirkətləri və ixtisaslaşmış təşkilatların iştirakı ilə ekspert qrupunun növbəti iclasında sənəd üzərində işi davam etdirəcəklər.
Strategiya layihəsinin müəyyən olunmuş qaydada MDB-nin ali orqanlarına baxılmaq üçün təqdim edilməsi nəzərdə tutulur.
Yada salaq ki, Azərbaycan iyul- avqust aylarında da MDB çərçivəsində keçirilən iki tədbirə qatılmamışdı. MDB-nin baş katibi Sergey Lebedev Azərbaycandan nümayəndə heyətinin addımını “müvəqqəti hal” kimi izah etmişdi. Onun sözlərinə görə, Bakıdan birliklə bağlı heç bir mənfi bəyanat olmayıb. “Ümid edirəm ki, vəziyyət normallaşacaq və Azərbaycan inteqrasiya əməkdaşlığının fəal iştirakçısı olaraq qalacaq”.
Rəsmi Bakı isə nümayəndə heyətinin MDB-nin iclaslarında iştirak etməməsini Rusiya ilə bağlı baş verən hadisələrlə əlaqələndirilmir. Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyev belə bir açıqlama vermişdi: “Azərbaycan tərəfi Aktau hadisəsi və digər məsələləri bununla bağlamır. Azərbaycan nümayəndə heyətinin iyulun 18-də Moskvada keçirilən MDB İqtisadi Şurasının iclasında iştirak etməməsinin müxtəlif səbəbləri ola bilər. İclasda iştirak edəcək şəxslərin şəxsi gündəliyindəki dəyişiklik, həmçinin başqa faktorların bu məsələyə təsiri də istisna deyil”.
Azərbaycan nümayəndəsinin MDB-nin son tədbirində niyə iştirak etməməsi barədə rəsmi Bakı mövqe bildirməyib.
