Qaradağ rayonu, Qızıldaş qəsəbəsində yerləşən 180 saylı tam orta məktəbdə Daşaltı əməliyyatı zamanı şəhid olmuş Azərbaycan Ordusunun könüllüsü, leytenant Azər Namazovun xatirəsinə həsr olunmuş anım mərasimi və barelyefin açılışı keçirilib.
Azər Rəhim oğlu Namazov 1966-cı il yanvarın 28-də Yardımlı rayonunun Çayüzü kəndində müəllim ailəsində anadan olub. 1971–1983-cü illərdə Qazax rayonunun Qıraq Kəsəmən kənd orta məktəbində təhsil alıb.
1984–1986-cı illərdə Belarusun Qrodno şəhərində sovet ordusunda hərbi xidmətdə olub. 1986–1990-cı illərdə Azərbaycan Dövlət Pedaqoji İnstitutunun Hərbi hazırlıq və bədən tərbiyəsi fakültəsini bitirib.
Ali təhsilini başa vurduqdan sonra Qaradağ rayonunun Qızıldaş qəsəbəsindəki 180 nömrəli orta məktəbdə hərbi-idman müəllimi kimi fəaliyyət göstərib. Gənclərə vətənpərvərlik ruhu aşılayan sevilən pedaqoqlardan olub.
Qarabağ müharibəsi başlayanda könüllü olaraq ön cəbhəyə yollanıb. Qısa müddətdə tağım komandiri, leytenant rütbəsinə yüksəlib. Şuşa və Malıbəyli istiqamətlərində döyüşlərdə böyük igidlik göstərib.
1992-ci il Daşaltı əməliyyatı zamanı döyüş yoldaşları ilə birgə mühasirəyə düşüb və sonadək vuruşaraq şəhidlik zirvəsinə ucalıb. Onun nəşi martın 28-də tapılıb və 29 mart 1992-ci ildə Bakıda Şəhidlər Xiyabanında dəfn olunub.
Hazırda Qızıldaş qəsəbəsindəki 180 nömrəli məktəb onun adını daşıyır. Hər il məktəbdə və qəsəbədə şəhidin xatirəsinə həsr olunmuş tədbirlər keçirilir.
Məktəbin müəllimi və heykəltəraş Leyla Babalı tərəfindən hazırlanan barelyef açılış tədbirində məktəbin pedaqoji kollektivi, şagirdlər, şəhidin ailə üzvləri, döyüş yoldaşları, millət vəkilləri, Qaradağ Rayon İcra Hakimiyyətinin və Təhsil Şöbəsinin nümayəndələri, həmçinin YAP və VHP-nin Qaradağ rayon təşkilatlarının sədrləri iştirak ediblər.
Tədbiri məktəbin direktoru Atakişi Cəfərov giriş sözü ilə açaraq bildirib ki, şəhid Azər Namazov vaxtilə bu məktəbdə dərs deyib və elə buradan da döyüşə yollanıb: “Məktəbimiz şəhidimizin adını daşıyır. Gənc müəlliməmiz Leyla Babalının təşəbbüsü ilə hazırlanan bu barelyef onun xatirəsinə olan ehtiramın ifadəsidir. Azər Namazovun döyüş və müəllimlik yolu gənclər üçün əsl örnəkdir.”
Çıxış edənlər şəhidin həyat və döyüş yolundan bəhs ediblər. Qeyd olunub ki, o, 1966-cı ildə Yardımlı rayonunun Çayüzü kəndində müəllim ailəsində doğulub, Azərbaycan Dövlət Pedaqoji İnstitutunun Hərbi hazırlıq və bədən tərbiyəsi fakültəsini bitirdikdən sonra məhz bu məktəbdə müəllim kimi fəaliyyət göstərib.
Qarabağ müharibəsi başlayanda müəllimlik fəaliyyətini yarımçıq qoyaraq könüllü şəkildə cəbhəyə yollanıb. Şuşa və Malıbəyli istiqamətlərində igidliklə döyüşüb. 1992-ci il yanvarında keçirilən Daşaltı əməliyyatında sonadək vuruşaraq şəhidlik zirvəsinə ucalıb.
Tədbirdə çıxış edənlər şəhidlərin Vətən qarşısında göstərdikləri qəhrəmanlıqları xatırladaraq, onların fədakarlığının bu gün gənclərin vətənpərvərlik tərbiyəsində mühüm rol oynadığını vurğulayıblar.
Anım mərasimi zamanı “Əsgər marşı” səsləndirilib, şəhidlərin ruhuna dualar oxunub. Tədbirin sonunda heykəltəraş Leyla Babalının şəxsi kolleksiyasından “Xarı bülbül” heykəli təqdim olunub. Qarabağın simvolu olan bu əsər Vətən torpağının azadlığı, şəhidlərin əbədi ruhu və xalqımızın birliyinin təcəssümü kimi dəyərləndirilib.
Samir ƏSƏDLİ
