Prezident Administrasiyasının sabiq aparat rəhbəri Ramiz Mehdiyevlə bağlı başladılan istintaq hərəkətləri sabiq əmlak məmurları arasında ciddi təlaşa səbəb olub.
Bu barədə redaksiyamızı məlumatlandıran mənbənin sözlərinə görə, vaxtiylə Ramiz Mehdiyevə yaxınlıqları ilə nümayişkəranə şəkildə fəxr edən, bundan qürur hissi duyan və dövlət torpaqlarını dədə malı kimi ona gen-bol peşkəş edən məmurlar, indi bu əlaqələri mümkün qədər gizlətməyə, birgə fəaliyyətlə bağlı dəlilləri yox etməyə çalışır. Buna səbəb “Ramiz Mehdiyev işi” çərçivəsində sabiq əmlak məmurlarının da istintaqa dəvət edilməsi, onların fəaliyyətinin araşdırılması ehtimalıdır. İndiki dönəmdə bu ehtimalın kifayət qədər yüksək olduğunu nəzərə alsaq, əmlak məmurlarının niyə bu qədər ciddi həyəcan keçirdiyi məlum olar.
Xatırladaq ki, Ramiz Mehdiyev Administrasiya rəhbəri vəzifəsində çalışarkən sabiq əmlak məmurlarının bilavasitə dəstəyi ilə yüz hektarlarla torpaq sahəsinə, çoxsaylı villalara və digər daşınmaz əmlak növlərinə yiyələnib. “Hamam suyu ilə dost tutan” bu məmurlar göstədikləri xidmətin müqabilində vəzifə toxunulmazlığı əldə ediblər. Bu gün Ramiz Mehdiyev dönəminin başa çatması ilə özlərini müdafiəsiz hiss edən sabiq əmlak məmurları, ictimai rəyin, eləcə də əlaqədar dövlət qurumlarının diqqətindən yayınmaqla məsuliyyətdən kənarda qalmağa çalışırlar. Bu isə sadəcə olaraq mümkünsüzdür.
Çox böyük ehtimalla, Ramiz Mehdiyevlə təmasda olan, qanunsuzluğa yol verən bütün şəxslər kimi keçmiş əmlak məmurları da məsuliyyətə cəlb ediləcək, onların da əməllərinə hüquqi müstəvidə qiymət veriləcək.
