Dövlətə xəyanətdə ittiham olunan Prezident Administrasiyasının sabiq rəhbəri Ramiz Mehdiyevin işi üzrə istintaq tədbirləri davam etdirilir. Ramiz Mehdiyevlə yanaşı, sabiq aparat rəhbərinə yaxın olan, onun qanunsuz tapşırıqlarını icra edən şəxslərin müəyyən edilərək məsuliyyətə cəlb edilməsi də əsas ictimai tələblərdən biri hesab edilir. Bu mənada Ramiz Mehdiyevə yaxınlığı ilə seçilən sabiq MTN şefi Eldar Mahmudov daha çox maraq kəsb edir.
Uzun müddət mühüm güc orqanlarının birinin rəhbərliyində təmsil olunan, komandasının bir qismi hələ də həbsxanada olan Eldar Mahmudovun keçmiş aparat rəhbəri Ramiz Mehdiyevlə yaxınlığı ilə bağlı ölkə mediasında çoxsaylı məqalələr yer almaqdadır. Eldar Mahmudovun əsasən iki istiqamətdə Ramiz Mehdiyevə dəstək verdiyi ehtimal olunur. Bunlardan biri sabiq nazirin Ramiz Mehdiyevin “qara kassa”sını iş adamlarının vəsaiti hesabına bəsləməsi, digəri isə keçmiş aparat rəhbərinə müxalif olan məmurların sıxışdırılması, məhşərə çəkilməsidir.
Eldar Mahmudovun vaxtiylə tutduğu vəzifənin önəmi və strateji əhəmiyyəti nəzərə alınarsa, sabiq nazirin Ramiz Mehdiyevə bu yöndə dəstək verməsi tamamilə mümkün görünür. Onu da unutmaq olmaz ki, belə bir əməkdaşlıq Eldar Mahmudov üçün də xeyli dərəcədə faydalı və cəzbedici ola bilərdi. Çünki xidmətlərinin qarşısında Ramiz Mehdiyevin də ona siyasi dəstək verməsi, Eldar Mahmudov və onun çətəsinin qanunsuz fəaliyyətini ört-basdır etməsi, bu fəaliyyətin guya ölkəmizin maraqlaırna xidmət etməsi ilə bağlı yanlış rəy formalaşdırması mümkün idi. Bu mənada Eldar Mahmudovun Ramiz Mehdiyevin sifarişlərinin əsas icraçılarından biri olması ehtimalı böyükdür.
Çox güman ki, əlaqədar qurumların “Ramiz Mehdiyev işi” çərçivəsində apardığı araşdırmalar Eldar Mahmudovla bağlı nüanslara da aydınlıq gətirəcək, hər bir ehtimal hüquqi müstəvidə dərindən araşdırılacaq.
