Musavat.com xəbər verir ki, Odessada yaşayan soydaşımız, Yeni Müsavat Media Qrupunun Ukrayna təmsilçisi Anar Natiqoğlu maraqlı video və məlumat paylaşıb. Onun bildirdiyinə görə, hazırda Ukraynada Rusiya işğalına qarşı vuruşan çeçen döyüşçülər Ramzan Kadırova videomüraciət ünvanlayıblar. Çeçen hərbçilər Qroznıya edilən son dron hücumları fonunda Kadırovun qisas və hədə dolu açıqlamalarına cavab verərək açıq çağırış ediblər.
Videomüraciətdə belə deyilir:
“Bismillahi-Rahmənir-Rəhim. Kadırov, sən lokasiya istəyirdin – bax, bizim lokasiyamız budur. Gözlərimizə baxmaq istəyirdin, biz burdayıq. Gəl. Üz-üzə danışaq. Sən kişi kimi danışmağı sevirsən, elə biz də hazırıq. Gəl görüşək. Sən VSU, Zelenski deyirsən – amma sənin atanı Zelenski öldürməyib, Putin öldürüb. Ona müraciət elə!
Bizim çeçen xalqını ruslar qırıb, ukraynalılar yox. Sən çeçenləri Ukraynaya döyüşməyə göndərəndə bunun cavabı olacağını bilməli idin. Sənin başına dronlar ona görə yağır ki, öz xalqını zorla bu müharibəyə sürükləyirsən. Sən atanla birlikdə hər zaman xalqı xilas edəcəyinizi deyirdiniz. Bəs hanı o sözlər? Gəl danışaq, görək necə döyüşürsünüz.
Biz hazırııq. Bir gün səni tapacağıq, inşallah. Unutma – biz hər gün sənə tərəf gəlirik.”
Müraciətin sonunda döyüşçülər Kadırovu birbaşa meydana çağırır və “boş hədələrlə yox, hesablaşmaq istəyirsənsə, buyur gəl” mesajı verirlər.
Qeyd edək ki, bu videomüraciət Ramzan Kadırovun Qroznıda baş verən son dron hücumlarından sonra səsləndirdiyi sərt bəyanatlara cavab olaraq çəkilib. Kadırov bir neçə gün əvvəl Ukraynaya qarşı qisas aksiyalarından danışaraq Kiyevi və Zelenski hökumətini hədələmişdi.
Musavat.com
