“Qanunun qəbulu mövcud qanunvericiliyə bir sıra yeni anlayışlar gətirir və bunlar beynəlxalq anlayışlardır. Bu anlayışlarla dilimiz daha da zənginləşir. Biz anlayışları dəyişdirsək, Azərbaycan dilində hansısa sözlə əvəz etsək, bütövlükdə bu qanunların effektivliyinə mane olarıq”.
Cumhuriyyet.az xəbər verir ki, bunu Milli Məclisin bu gün keçirilən iclasında parlamentin Hüquq siyasəti və dövlət quruculuğu komitəsinin sədri Əli Hüseynli “Kraudfandinq haqqında” qanun layihəsinin ikinci oxunuşda müzakirəsində deputatların qanunun adının dəyişdirilməsi, beynəlxalq terminlərin Azərbaycan dilində qarşılığı ilə əvəz edilməsi barədə təkliflərinə münasibət bildirərkən deyib.
Əli Hüseynli bildirib ki, bu qanunlar həm Azərbaycan vətəndaşları, həm də investorlar üçündür: “Onsuz da bizim qanunvericiliyimizdə kifayət qədər bu cür anlayış var. Əsas odur ki, həmin anlayışların bu qanunda izahatları da verilib”.
Sədr Sahibə Qafarova da həmkarının fikrini dəstəkləyib: “Siz vacib məqama toxundunuz – tərcümə məsələsinə. Çünki tərcümədə ekvivalentlik yoxdursa, verilən termin qalmalıdır. Düz deyirsiniz ki, bu, beynəlxalq təcrübədə artıq qəbul olunur və hər bir terminin öz tarixçəsi var. Ona görə də bu terminləri saxlamaqla bizim qanunvericilik daha çox udur, nəinki uduzur”.
Deputat Hikmət Babaoğlu isə “Kraudfandinq” termininin anlaşılan olmadığını deyib: “Bu termin dilimizə yaddır. Bu gün dilimiz üzərində təzyiq yaradan əsas vasitələrdən biri də bu terminlərdir.
“Kraudfandinq” sözünün tərcümədən mənası kollektiv maliyyələşdirmə və ya ictimai maliyyələşdirmədir. Əgər mümkündürsə, qanunvericilik təşəbbüsü ilə çıxış edən subyekt razıdırsa, bunu dəyişərək “Kollektiv maliyyələşdirmə haqqında” və ya “İctimai maliyyələşdirmə haqqında” qanun edək”.
Parlamentin İqtisadi siyasət, sənaye və sahibkarlıq komitəsinin sədri, deputat Azər Əmiraslanov da qanunun adının dəyişdirilməsi ilə bağlı təklifə münasibət bildirib.
“Biz bu adları nə qədər milliləşdirməyə cəhd edəcəyiksə, müəyyən uğursuzluğumuz ola bilər. Gərək, bunu tam dəqiq ifadə edək. Təhrif edilmiş adlar qanunun mahiyyətini təhrif edə və bizi əsas məqsəddən uzaqlaşdıra bilər”, – deyə o vurğulayıb.
Bunun ardınca deputat Hikmət Babaoğlu yenə də söz istəyib və komitə sədrindən “ictimai” və “kütləvi” sözünün fərqini izah etməsini xahiş edib.
Milli Məclisin Sədri Sahibə Qafarova isə məsələnin işçi qaydada müzakirəsinin davam etdirilməsini tövsiyə edib.
