Son illər cənab Prezident İlham Əliyevin qayğısı sayəsində bölgələrimizdə genişmiqyaslı quruculuq işləri həyata keçirilir. Regionların sosial-iqtisadi inkişafı dövlət proqramlarının uğurlu icrası sayəsində gündən-günə abadlaşan bölgələrimizdən biri də Qazax rayonudur. Bunu ölkə rəhbərinin tapşırığına əsasən “Azərsu” ASC tərəfindən Qazax şəhərinin içməli su və tullantı su sistemlərinin yenidən qurulması layihəsinin icrasından sonra rayonda aparılan genişmiqyaslı abadlıq işləri söyləməyə əsas verir. Xüsusilə də şəhərin prospekt və küçələrinin asfaltlanması, səkilərə yeni tamet, bardür düzülməsi, qaz, elektrik, rabitə xətlərinin səliqəyə salınması, küçələrin işıqlandırılması söylədiklərimizin əyani sübutudur.
Şəhərin Heydər Əliyev prospektində, bir neçə küçədə, eləcə də çoxmənzilli yaşayış binalarının həyətinə yeni asfalt örtüyü vurulmuş, quruculuq işləri aparılaraq “Abad məhəllə” kimi sakinlərin istifadəsinə verilib.
Rayonda aparılan abadlıq işləri bu gün də uğurla davam etdirilir. Nəqliyyat vasitələrinin hərəkətinin yaxşılaşdırılması, vətəndaşların rahatlığını təmin etmək məqsədilə təqdirəlayiq işlər görülür.
Ötən yazılarımızda Qazax rayonunda daha 4 küçəyə – şəhərin Nəsrəddin Tusi, şəhid Yunis Kazımov (Bakı küçəsindən M.Ə.Rəsulzadə küçəsinin kəsişməsinə kimi), Ağköynək kəndində Çərkəz İsmayılov və Cabir Hüseynov (Mehdi Hüseyn küçəsinin kəsişməsindən magistral yola kimi) küçələrinə yeni asfalt örtüyünün döşənəcəyi barədə məlumat vermişdik. Artıq sözügedən küçələrdən ikisində – Ağköynək kəndində yerləşən Cabir Hüseynov və Çərkəz İsmayılov küçələrində asfaltlanma başa çatıb.
Şəhərin Nəsrəddin Tusi küçəsinin asfaltlanmasına başlanılıb və işlər davam etdiriləcək.
Yanvarın 11-də Qazax Rayon İcra Hakimiyyətinin başçısı Rəcəb Babaşov yeni asfalt örtüyü döşənən küçələrdə görülmüş işlərlə tanış olub.
Sakinlər yaşadıqları küçədə yeni asfalt örtüyünün vurulmasını dövlətin, ölkə başçısının onlara olan növbəti qayğısı kimi qiymətləndirərək buna görə ölkə Prezidenti İlham Əliyevə minnətdarlıqlarını bildirirlər
