Dövlət Su Ehtiyatları Agentliyinin Regional Su Meliorasiya Xidmətinin tabeliyində fəaliyyət göstərən Abşeron Su Meliorasiya Sistemlərinin İstismarı İdarəsində aparılan yoxlamanın ardınca rəhbər vəzifələrdə ciddi dəyişikliklər edilib.
Tendensiya.com xəbər verir ki, idarənin rəisi Etibar Eldar oğlu Nəbiyev vəzifəsindən azad edilib. Bununla bağlı əmr Regional Su Meliorasiya Xidmətinin İdarə Heyətinin sədri Zakir Quliyev tərəfindən sentyabrın 16-da imzalanıb.
Əmrdə E.Nəbiyevin öz ərizəsi əsas götürülüb. Sənədə əsasən, 14 mart 2023-cü ildə onunla bağlanmış əmək müqaviləsinə xitam verilib. Həmçinin istifadə etmədiyi 63 təqvim günü məzuniyyətə görə kompensasiya ödənilməsi nəzərdə tutulub.
Burada diqqətçəkən məqam ondan ibarətdir ki, rəsmi sənəddə Nəbiyevin vəzifədən ayrılmasının səbəbi kimi yoxlama zamanı aşkarlanan nöqsanlar göstərilmir. Sənəddə yalnız onun öz ərizəsi əsas götürülür. Halbuki vəzifədən azad edilmə yoxlamanın yekunlaşmasından dərhal sonra baş verib.
Zakir Quliyevin imzaladığı əmrin digər bəndi ilə Abşeron Su Meliorasiya Sistemlərinin İstismarı İdarəsinin rəisi vəzifəsinin funksiyalarının müvəqqəti icrası Regional Su Meliorasiya Xidmətinin İdarə Heyəti sədrinin müşaviri Orxan Mahmud oğlu Mahmudova həvalə edilib.
Məlumata görə, kadr dəyişiklikləri yalnız idarə rəisi ilə məhdudlaşmayıb. Abşeron Su Meliorasiya Sistemlərinin İstismarı İdarəsinin Abonent xidmətləri şöbəsinin rəisi Səbuhi Mustafayev və rəis müavini İlhamə adlı xanım da vəzifələrindən çıxarılıblar.
Beləliklə, eyni yoxlamanın ardınca idarənin bir neçə məsul şəxsi vəzifəsini itirib. Bu isə yoxlamanın nəticələrinin kifayət qədər ciddi olduğunu göstərən əsas məqamlardan biridir.
“Kod 35” məsələsi və cavabsız qalan suallar
İdarədəki yoxlama ilə bağlı bundan əvvəl də mediada məlumatlar yayılmışdı. Sentyabrın əvvəlində yayılan xəbərlərdə yoxlama zamanı “kod 35” kimi qeyd olunan, ünvanı naməlum sayğac və abonent kodları ilə bağlı məsələlərin araşdırıldığı bildirilirdi.
Mediada səsləndirilən iddialara görə, ünvanı bəlli olmayan sayğaclarla bağlı fakturalama aparılması və bəzi abonent kodlarının başqa şəxslərə verilməsi kimi hallar yoxlamanın predmetlərindən olub.
Əgər bu iddialar yoxlama materiallarında da öz əksini tapıbsa, ortaya kifayət qədər ciddi suallar çıxır: bu əməliyyatlar necə həyata keçirilib, kimlərin nəzarəti altında baş verib və məsul şəxslər barəsində hansı tədbirlər görülüb?
Etibar Nəbiyevin yoxlamanın yekunundan sonra vəzifədən ayrılması bu məsələlərlə bağlı şübhələri daha da artırır. Lakin onun məhz “kod 35” və digər qeyd olunan məsələlərə görə vəzifədən çıxarıldığını təsdiqləyən rəsmi sənəd ictimaiyyətə təqdim edilməyib. Əksinə, rəsmi əmrdə onun öz ərizəsi əsas götürülüb.
Bu vəziyyət isə başqa bir mühüm sual doğurur: ciddi nöqsanlar barədə məlumatlar varsa, niyə məsələ yalnız vəzifədən ayrılma ilə yekunlaşır?
Etibar Nəbiyev 2024-cü ildə Şəmkir Suvarma Sistemləri İdarəsinin rəhbəri vəzifəsindən Abşeron Su Meliorasiya Sistemlərinin İstismarı İdarəsinə rəhbər təyin edilmişdi.
Hazırkı dəyişikliklərdən sonra idarəyə kimin daimi rəhbər təyin ediləcəyi isə hələlik rəsmən açıqlanmayıb.
Məlumata görə, Qobustan Qış Otlaqlarının Su Təminatı Sistemlərinin İstismarı İdarəsinin rəisi Mirkamil Seyidovun Nəbiyevi əvəzləyəcəyi gözlənilir. Lakin bu təyinat hələ rəsmiləşdirilməyib.
Vəzifədən çıxarmaq kifayətdirmi?
Ortada bir neçə rəhbər şəxsin vəzifədən uzaqlaşdırılması ilə nəticələnən yoxlama, mediada ciddi nöqsanlarla bağlı yayılan məlumatlar və buna baxmayaraq, rəsmi əmrdə yalnız “öz ərizəsi” formulunun yer alması var.
Bu mənzərə təbii olaraq daha ciddi araşdırma tələb edir. Əgər yoxlama zamanı dövlət qurumunda maliyyə, uçot, sayğac və abonent kodları ilə bağlı ciddi pozuntular müəyyən edilibsə, cəmiyyətin gözləntisi yalnız vəzifə dəyişikliyi ilə məhdudlaşmır. Kimlərin məsuliyyət daşıdığı, hansı qərarların qəbul edildiyi və dövlətə və ya abonentlərə hər hansı zərərin vurulub-vurulmadığı da açıqlanmalıdır.
Əks halda, məsul şəxsin ərizəsi əsasında vəzifədən getməsi belə bir təsəvvür yarada bilər ki, ortada ciddi nöqsanlar olsa belə, məsələni inzibati qaydada vəzifə dəyişikliyi ilə bağlamaq kifayət hesab edilir.
Xüsusilə də idarənin bir neçə vəzifəli şəxsi eyni vaxtda vəzifədən çıxarılıbsa, araşdırmanın nəticələri və məsuliyyət məsələsi daha açıq şəkildə ictimaiyyətə təqdim edilməlidir. Əks halda, “yoxlama başa çatdı” deməklə sualların da bitdiyini söyləmək mümkün deyil.
Orxan Məmmədov
