“AAAF Park” Yaşayış Kompleksinin girişindəki Ümummilli Lider Heydər Əliyevin posterinin və dövlət atributları olan guşənin sökülərək yerində inşa edilən obyekt tamamlandı
Abşeron rayonu Xırdalan şəhərində AAAF Park yaşayış kompleksinin girişində sakinlərə yaradılan narahatçılığa məhəl qoyulmadan ölkə qanunlarını heçə sayaraq qanunsuz tikinti işləri aparılır. Bütün bu qanunsuzluqlar FHN və onun müvafiq qurumlarının, Abşeron rayon İH və onun məsul şəxslərinin gözləri qarşısında baş verir. Sual olunur ki, adları çəkilən qurumlar, konkret olaraq Abşeron rayon İcra hakimiyyətinin başçısı Abidin Fərzəliyev və bu rayonun baş memarı Kənan Babayev , Dövlət Şəhərsalma Arxitektura Komitəsinin sədri Anar Quliyev, FHN Tikintidə Təhlükəsizıiyə Nəzarət Dövlət Agentliyinin rəisi Cəbrayıl Xanlarov bütün baş verənləri görmürlərsə və yaxud görməzdən gəlirlərsə onda onlar nə işlə məşğul olurlar ? Dövlət o boyda strateji əhəmiyyətli postu onlara nədən etibar edib?
Apardığımız araşdırmaya əsasən AAAF Park yaşayış kompleksinin girişində məktəbin yanında heç bir tikinti təhlükəsizlik normaları gözlənilmədən orda oxuyan şagirdlərin həyatını heçə sayaraq hətta məktəb yolunuda zəbt eləməkdən çəkinmədən inşa olunan və sakinlərin həyatını cəhənnəmə çevirən qanunsuz tikili Vüqar Sədibəyli adlı iş adamı tərəfindən aparılır. Qanunsuz tikinti işlərinə rəhbərlik edən Namiq Məmmədov adlı şəxs isə sakinlərin etirazına cavab olaraq bildirib ki, “lazım olan yerlərlə anlaşıb tikintiyə icazə almışıq”.Lazım olan yerlər dedikdə isə nəzərdə tutulan şəxslər Abşeron İcra Hakimiyyətində tikinti işlərinin qara kassası kimi sayılan Nurlan Həsənov, FHN də tikintiyə Nəzarət şöbəsinin rəisi Samir Musayev , Şəhərsalma komitəsində isə O qurumun Ərazi Tikinti PLanlaşdırma Mərkəzinin Sədri Ramin Abdullayevin yaxın qohumu və kassası Fərid Hüseynovdur.
Burda bir neçə məqam diqqət çəkir. Birincisi sakinlər bütün aidiyyatlı dövlət strukturlarına etiraz məktubları ünvanlasalar da lazımi cavab almayıblar. Belə qənaətə gəlmək olar ki, deməli qanunsuz tikintini həyata keçirənlər həqiqətən də həmin strukturlarla razılığa gəliblər. Əksini sübut etmək həmin dövlət qurumlarının vəzifəsidir.
Sakinlər tərəfindən bildirilir ki, qanunsuz tikinti işləri heç bir hüquqi normativə uyğun aparılmır. Minlərlə insanın narahatçılığına səbəb olan, hətta Ulu Öndərin xatirəsinə hörmətsizlik göstərilən tikinti işləri bu qədər narazılığa baxmayaraq dayandırılmır. Görəsən minlərlə insanın etirazından, Azərbaycan dövlətinin qanunlarından üstün olan güc hansıdır?
Çox hörmətli FHN Kəmaləddin Heydərov, digər məsul şəxslər yəqin ki, bizim bu suallarımıza cavab verərlər. Hər halda nazirliyin bu sahəyə məsul şəxslərinin indiyə qədər bu boyda qanunsuzluğa göz yummasının səbəbləri cənab naziri və digər məsul şəxsləri də maraqlandırmalıdır. Azərbaycan hüquqi dövlətdir və qanunların aliliyi qorunur. Kimsənin qanunları heçə saymağa ixtiyarı yoxdur və bu birbaşa dövlətə və cənab Prezidentə qarşı xəyanətdir. Əgər deyilənlərə ən üst səviyyədə cavab verilməsə deməli onlar da bu qanunsuzluğa imza atanların sırasındadır!
