Qarlı və şaxtalı hava şəraitində evsiz insanlar üçün vəziyyət daha da çətinləşir. Küçədə yaşayan şəxslərin soyuqdan qorunması üçün hansı imkanlar var?
Əmək və Əhalinin Sosial Müdafiəsi Nazirliyinin Sosial Xidmətlər Agentliyinin mətbuat xidmətinin rəhbəri Murad Həşimov bildirib ki, hazırda sığınacaqda 46 kişi və 32 qadın olmaqla, ümumilikdə 78 nəfər yaşayır.
“Müəssisəyə qəbul olunan şəxslər 6 ay müddətində yemək, yaşayış yeri və geyimlə təmin edilir. Həmçinin sosial reabilitasiya xidmətləri də göstərilir. Çətin vəziyyətə düşən hər kəs qanunvericiliyə uyğun şəkildə müəssisənin xidmətlərindən yararlana bilər”, – o qeyd edib.
Evsiz insanlar necə müraciət edə bilər?
Evsiz insanlar və ya onların yaxınları aşağıdakı yollarla sığınacağa qəbul üçün müraciət edə bilərlər:
– Şəxsin özü və ya qanuni nümayəndəsi tərəfindən;
– Daxili İşlər Nazirliyi, yerli icra hakimiyyəti və bələdiyyələrin göndərişi ilə;
– DOST mərkəzləri və Sosial Xidmətlər Agentliyinin yerli qurumları vasitəsilə;
– Qaynar xətt və Vatsap nömrələri ilə:
– (012) 525 41 30 (qaynar xətt)
– (050) 525 41 30 (Vatsap).
Əgər küçədə yaşayan və yardıma ehtiyacı olan birini görsəniz, yuxarıda göstərilən əlaqə vasitələri ilə məlumat verə bilərsiniz.(axar.az)
