Şou-biznes nümayəndələrinin gəlirləri və onların nə qədər vergi öhdəlikləri həmişə maraq doğurub. Onlar gəlirləri barədə fantastik rəqəmlər açıqlasa da, vergi yükü barədə ictimaiyyətə açıq və şəffaf məlumat təqdim etmir.
Bu yaxınlarda müğənni Aysun ayda 70 min manat qazandığını demişdi. O nəqədər vergi ödəyir? Ümumiyyətlə, ödəyirmi?
Cumhuriyyet.az xəbər verir ki, mövzu barədə “Yeni Sabah”a danışan hüquqşünas Əkrəm Həsənov məsələnin məğzini belə izah edib:
“Əlbəttə, hər bir kəs, o cümlədən, şou-biznes əhli öz gəliri üzrə vergi ödəməlidir. Gəlir vergisi, məcəlləyə əsasən, 2500 manata qədər olan ərazidə aylıq 14 faiz, daha yüksək məbləğdə isə 25 faiz olaraq hesablanır.
Təbii ki, müğənnilər də bu vergini ödəməlidir. Buna əməl edirlər, ya yox, vergi sirridir.
Hamımız başa düşürük ki, onların gəliri qeyri-rəsmidir. Bir qayda olaraq, vergi orqanı belə gəlirlərə nəzarət edə bilmir. Bəzi hallarda bank hesabına köçürülmə olur. Lakin ödəniş daha çox əldən-ələ olur.
Vergi orqanının daimi nəzarət üçün o qədər işçisi yoxdur. Konkret kimsə yoxlaya bilər ki, müğənni hara getdi, nə qədər oxudu, hansı tədbirdə çıxış etdi və s. Ancaq olunan ödəniş məbləğini gərək ödəyən şəxs etiraf etsin. Bu da olmadığı üçün bir baxımdan iş çətinləşir”.
Ə.Həsənov Vergi Məcəlləsindəki çatışmazlıqlardan da söz açıb:
“Azərbaycanda gəlir və xərc bəyannaməsi yoxdur. Nəinki müğənnilər, heç dövlət məmurları üçün də o, nəzərdə tutulmayıb. Rəsmilərin əksər hissəsi qeyri-rəsmi gəlir əldə edir. Paket maaş, rüşvət alırlar. Vergi verirlərmi? Yox. Nəzarət etmək isə mümkün deyil.
Normal hüquqi və iqtisadi sistemi olan ölkələrdə tam olmasa da, gəlir və xərc bəyannaməsi yolu ilə nəzarət edilə bilir. Şəxsdən tələb edirlər ki, bu qədər gəlir əldə etmisən və müəyyən məbləğdə xərcin var, amma vergi ödəməmisən. Təəssüflər olsun ki, bu, Azərbaycanda yoxdur”.
