Əli Nağıyevin beynəlxalq konfrasdakı çıxışı Azərbaycanın sülh siyasəti haqqında nə deyir?
Məlum olduğu kimi, Bakıda “Əfqanıstan: regional təmaslar, təhlükəsizlik və inkişaf” mövzusunda beynəlxalq konfrans keçirilib. Konfransda çıxış edən Azərbaycan Respublikasının Dövlət Təhlükəsizliyi Xidmətinin (DTX) rəisi general-polkovnik Əli Nağıyev, Əfqanıstan dövlətinin terrorizmə, narkotik vasitələrin qanunsuz dövriyyəsinə qarşı apardığı mübarizəni alqışlayıb, Azərbaycanın bundan sonra da Əfqanıstan dövlətinə sözügedən problemlərə qarşı mübarizədə dəstək verəcəyini bildirib. DTX rəisi həmçinin qeyd edib ki, dünya dövlətləri Əfqanıstanın terrorizmə, narkotiklərin qanunsuz mübadiləsinə qarşı mübarizəsini dəstəkləməli, bu məsələdə ciddi fəallıq sərgiləməlidir.
Əli Nağıyevin məlum açıqlaması Müzəffər Ali Baş Komandan İlham Əliyevin rəhbərlik etdiyi Azərbaycan dövlətinin sadəcə Əfqanıstana deyil, bütün dünyaya – insanlıq və bəşəriyyətə münasibəti baxımından olduqca əhəmiyyətlidir. DTX rəisinin çıxışından da göründüyü kimi, Azərbaycan hər bir ölkə, hər bir xalqa sülh və təhlükəsizlik arzulamaqla yanaşı, sülh və təhlükəsizlik üçün təhdid təşkil edən hallara qarşı birgə mübarizəni zəruri hesab edir.
Uzun illər erməni faşizminə qarşı təkbaşına mübarizə aparan, Qarabağ problemini sonda öz gücü ilə – yenilməz ordusu və böyük sərkərdəsi İlham Əliyevin qəhrəmanlığıyla həll edərək ərazi bütövlüyünü təmin edən Azərbaycan, bu cür təhdidlərə qarşı birgə mübarizənin əhəmiyyətini hər kəsdən daha çox dərk etməkdə, daha aydın başa düşməkdədir. Öz təcrübəsindən çıxış edən Azərbaycan haqlı olaraq belə hesab edir ki, qlobal terrorizmə qarşı effektiv mübarizənin yolu dünya dövlətlərinin həmrəyliyindən, birgə mübarizəsindən keçir. Məhz bu həqiqət Əli Nağıyevin çıxışında öz əksini qəti və aydın şəkildə tapmışdır.
DTX-nın təşkilatçılığı və 20 ölkənin xüsusi xidmət orqanları nümayəndələrinin iştirakı ilə Bakıda “Əfqanıstan: regional təmaslar, təhlükəsizlik və inkişaf” mövzusunda beynəlxalq konfransın keçirilməsi adıçəkilən qurumun beynəlxalq sülh və təhlükəsizliyə töhfəsidir. Bu konfrans bir daha Azərbaycanın sadəcə Cənubi Qafqazda deyil, dünyanın ən uzaq ölkələrində belə sülhün, təhlükəsizliyin təmininə böyük önəm verdiyini, bunun üçün praktiki baxımdan konkret addımlar atdığını göstərir. Bu fakt bir daha göstərir ki, Prezident İlham Əliyevin liderliyi ilə Azərbaycanın bütün dünyada apardığı sülh və təhlükəsizlik siyasəti DTX tərəfindən qüsursuz şəkildə icra edilməkdə, beynəlxalq platformada uğurla təbliğ olunmaqdadır.
Ümid edirik ki, Azərbaycanın Əfqanıstanda sülhə və təhlükəsizliyə verdiyi töhfə digər dünya dövlətləri tərəfindən inkişaf etdiriləcək, dünya qlobal terrorizm və narkotik vasitələrin qanunsuz dövriyyəsinə qarşı mübarizədə öz səylərini birləşdirəcək. Unutmaq olmaz ki, qlobal terrorizm sərhəd tanımır və bu problemə qarşı yeganə effektiv mübarizə ona qarşı qlobal miqyasda mübarizəni təmin etməkdir, bu mübarizədə səmimi həmrəylik sərgiləməkdir.
Seymur ƏLİYEV
