Dünyanın ən böyük meqapolislərindən biri, maliyyə mərkəzi Nyu-York şəhərinin bələdiyyə sədri postuna 34 yaşlı Uqandada doğulmuş Hindistan əsilli müsəlman Zahran Mamdani seçildi.
Demokrat Partiyasının namizədi olan Mamdani hələ seçki kampaniyası dövründə favorit namizəd hesab olunurdu. Yeri gəlmişkən, Zahran Mamdani son 100 ildə Nyu-York meri seçilmiş ən gənc siyasətçidir. Ancaq eyni zamanda bu seçkilərdə 2 milyon seçici iştirak edib və son 50 ildə ən aşağı seçici fəallığı qeydə alınıb.
İlkin nəticələrə əsasən Mamdani 50,4 faiz, onun əsas rəqibi, Nyu-Yorkun sabiq qubernatoru, müstəqil demokrat namizəd Endryu Kyomo 41,6 faiz, digər namizəd, respublikaçı Kertis Sliva isə 7,1 faiz səs ala bilib.
Mamdani səs-küylü seçki kampaniyası keçirib və faktiki olaraq prezident Trampla mübarizə apardı. ABŞ prezidenti Mamdanini “kommunist” adlandırıb və seçkilərə iki gün qalmış Nyu-York seçicilərini digər demokrat namizəd Endryu Kyomoya səs verməyə çağırdı və bu çağırışını onun kommunist olması ilə əsaslandırdı. CBS televiziyasına müsahibəsində Tramp dedi ki, Kyomo fanatı olmasa da, pis demokrat və kommunist arasında seçim etməli olsa həmişə pis demokratı seçər.
Lakin görünür ki, məhz Trampdan narazılıq səbəbindən Mamdani daha çox səs alaraq ABŞ-ın ən böyük şəhərinin bələdiyyə sədri seçilib. Yeri gəlmişkən, Mamdani seçki kampaniyası zamanı elan edib ki, mer seçilərsə, bu şəhərə gələcəyi təqdirdə Beynəlxalq Cinayət Məhkəməsinin qərarını icra edərək İsrail baş naziri Netanyahunun həbsinə göstəriş verəcək.
Mamdaninin atası siyasət üzrə professor, hindistanlı müsəlman, anası isə kinoprodüserdir. Həyat yoldaşı Suriya əsillidir.
Trampın liberal iqtisadi siyasətinə qarşı Mamdani Nyu-Yorkda ciddi sosial islahatlar vəd edib. O, varlılardan daha çox vergi almaq hesabına Nyu-Yorku daha yaşanacaq bir vəziyyətə gətirmək vədi verib. Bura 200 min sosial mənzilin inşası, ev kirayə haqlarının sabit saxlanması, pulsuz şəhərdaxili nəqliyyat və sair daxildir.
Prezident Tramp isə hələ seçki kampaniyası zamanı bəyan edib ki, Mamdani seçilərsə Nyu-Yorka federal büdcədən ayrılan yardımı dayandıracaq.
Bu isə o deməkdir ki, Nyu-Yorkda Mamdani və Tramp arasında gərginlik yaşanacaq. Nyu-York 100 milyard dollardan çox büdcəsi olan böyük bələdiyyə deməkdir və dünyanın faktiki maliyyə “paytaxtı” hesab olunur.
Mamdaninin qələbəsi demokratların ötən il bu vaxt prezident seçkilərində məğlubiyyətdən sonra ciddi bir ümid yaradacaq. Yeri gəlmişkən, Mamdani özü də kampaniyası və qələbə çıxışı zamanı gələcək üçün ümiddən bəhs edib.
Yeri gəlmişkən, Nyu-Yorkla yanaşı Virciniya və Nyu-Cersi ştatlarında qubernator seçkilərində demokratlar qalib gəlib. Bu, prezident Tramp üçün heç də yaxşı nəticə deyil. Yəni ən yaxşı halda Tramp daxili sosial-siyasi vəziyyətə daha çox diqqət ayırmağa məcbur olacaq.
Həm seçki kampaniyası gedişində, həm də qələbədən sonra bütün yazılarda Zahran Mamdaninin müsəlman olması faktı qabardılıb. Ancaq bu, müsəlmanlar üçün nəsə vəd etmir, Mamdani müsəlman olaraq deyil, sosialist və gənc siyasi fəal olaraq apardığı kampaniyada qalib gəlib.
Mamdani kimi müsəlman olması faktı yeri gəldi-gəlmədi qabardılan Londonun meri Sadiq Xanın Britaniya paytaxtının rəhbəri olması müsəlmanlar üçün heç nə ifadə etmir. Əksinə, Sadiq Xan da zaman-zaman müsəlman olduğu üçün tənqid və təhqirlərə məruz qalır.
Zahran Mamdaninin qələbəsi təkcə ABŞ-da və Nyu-Yorkda deyil, ümumiyyətlə, dünyada gənc siyasətçilər üçün bir ümid işığı yaradacaq, siyasi dəyişiklik ümidlərini cücərdəcək.
Kənan Rövşənoğlu,
Xüsusi olaraq Musavat.com üçün
