Sabiq MTN şefi Eldar Mahmuov və onun qudası Cahangir Hacıyevin Beynəlxalq Bankdakı dövlət pullarına qənim kəsildiyi, müxtəlif üsul və vasitələrlə dövlətə milyonlarla manat məbləğində ziyan vurduğu heç kimə sirr deyil. Bu da sirr deyil ki, məlum olay Azərbaycan dövlətinin maliyyə təhlükəsizliyi üçün təhdidə çevrilmiş, uzun müddət yalnız Azərbaycan deyil, dünyanın bir sıra qabaqcıl media orqanlarının əsas müzakirə mövzusu olmuşdur.
Bugünlərdə Prezident Administrasiyasının sabiq Aparat rəhbəri Ramiz Mehdiyevin dövlətə xəyanət, eləcə də digər ağır maddələrlə ittiham edilməsi Beynəlxalq Bank məsələsində “boz kardinal”ın iştirakı ilə bağlı müxtəlif iddiaları aktuallaşdırıb. İctimai fikirdə yer alan məlumatlara görə, Beynəlxalq Bankdan külli miqdarda pul çıxaran və daha sonra bu pulların izini itirməyə çalışan şəxslərdən biri də Ramiz Mehdiyev olub. İddialara görə, Ramiz Mehdiyev ona məxsus 140 hektarlıq üzüm bağının salınmasını, eləcə də çaxır zavodunun inşasını məhz Beynəlxalq Bankdan çıxardığı pullar hesabına təmin edib. Bu prosesdəki iştirakını isə məhz Eldar Mahmudovun vasitəsilə ört-basdır etdirib.
Bu mənada Eldar Mahmudovun, eləcə də sabiq MTN şefinin komandasında yer alan digər şəxslərin istintaqa cəlb edilməsinə ciddi ehtiyac var. Bu şəxslərin fəaliyyətinin Ramiz Mehdiyev işi çərçivəsində yenidən təhqiq edilməsi, araşdırılması faydalı ola bilər.
Xatırladaq ki, hələ Eldar Mahmudov olayı zamanı bir sıra şəxslərin, eləcə də keçmiş MTN-nin Təsərrüfat idarəsinin rəisi olan general Nizaməddin Həmidovla bağlı da hüquqi müstəvidə müəyyən addımların atılacağı gözlənilsədə, bu gözləntilər özünü doğrultmadı. Halbuki, media və ictimai rəydə bununla bağlı ciddi gözləntilər mövcud idi. Bu mənada Ramiz Mehdiyev işi çərçivəsində Eldar Mahmudovla yanaşı, onun azadlıqdakı digər komanda üzvlərinin, eləcə də Nizaməddin Həmidovun fəaliyyət və əlaqələrinin yenidən təftişinə ciddi ehtiyac var.
Yəqin ki, Ramiz Mehdiyevlə bağlı bütün digər iddialar kimi bu iddialar da əlaqədar qurumlar tərəfindən ciddi şəkildə araşdırılacaq və ortaya çıxacaq hər bir qanun pozuntusu sərt şəkildə cəzalandırılacaq.
