Rusiya prezidenti Vladimir Putin 2026-cı ildə də Ukrayna ilə bağlı əsas hədəflərinə çata bilmədi. Son mətbuat konfransında o, özünü nə qədər o yerə qoymasa da, nikbin göstərməyə çalışsa da, gerçək belədir: torpaq işğalı Rusiyaya getdikcə əvvəlkindən qat-qat başa gəlməkdədir.
Söhbət həm insani və texniki resurslar, həm də sürətlə artan maliyyə xərclərindən gedir. Təsadüfi deyil ki, təcavüzkar müharibəni maliyyələşdirmək üçün Putin hakimiyyətinin vətəndaşların banklardakı əmanətini zorla ordu xərclərinə yönəltmək qərarı verdiyi haqda məlumat yayılıb. O biri yandan isə ölkəni əmək qabiliyyətli və intellektual adamlarının xaricə axını güclənməkdədir…
“Rusiya Ukraynadakı müharibə səbəbindən ciddi iqtisadi çətinliklərlə üzləşib və vəziyyət 2026-cı ildə xeyli pisləşə bilər”.
Musavat.com xəbər verir ki, bu barədə ABŞ-ın nüfuzlu “The Washington Post” qəzeti yazıb.
Nəşr hesab edir ki, prezidenti Donald Trampın Rusiyanın Ukraynaya qarşı müharibədə üstünlüyü qoruyub saxladığı iddialarına baxmayaraq, ölkənin iqtisadi vəziyyəti bunun əksini göstərir. “Rusiya diktatoru Vladimir Putin əvvəllər hərbi xərclərə yönələn nağd pul ehtiyatlarının və borc vəsaitlərinin əhəmiyyətli bir hissəsini xərcləyib və qarşıda yeni maliyyə çətinlikləri var”, – təhlildə qeyd olunur.
“The Washington Post” görə, Rusiyanın neft sektoruna qarşı ABŞ-ın sərt yeni sanksiyaları büdcə kəsirini daha da artırıb, maliyyə sistemi üçün isə əlavə risklər yaradıb. “Məhdudiyyətlər “Rosneft” və “Lukoyl” də daxil olmaqla, böyük şirkətlərə təsir göstərərək Moskvanı bur barel neft üçün 20 dollardan yuxarı endirimə vadar edib. Ekspertlərin qənaətincə, neft və qaz sənayesi böhrana doğru sürünür və yeni tədbirlər bu prosesi yalnız sürətləndirir”, – məqalədə vurğulanır.
Təhlildə həmçinin vurğulanır ki, Putin müharibəyə son qoymaq üçün danışıqlarda sərt mövqe tutsa belə, gələn il ödənişlərin edilməməsi və bank böhranı riskləri qalır: “Qəzetə danışan iqtisadçıların fikrincə, 2026 müharibənin Rusiya iqtisadiyyatına həqiqətən sarsıdıcı zərbə vurduğu ilk il ola bilər. Hərçənd Rusiya elitasının əksər üzvləri kütləvi sosial etirazları və ya iqtisadi çətinliklərin Kremlin siyasi qərarlarına təsirini gözləmirlər”…
Analitiklərin yekdil qənaətincə, 2025-ci ilin sonunadək Rusiyada inflyasiyanın sürətlənməsi, hərbi xərclər səbəbindən böyüyən büdcə kəsiri və neft və qaz gəlirlərinin azalması fonunda iqtisadi vəziyyət pisləşməyə davam edəcək, iqtisadi artım isə əhəmiyyətli dərəcədə yavaşlayacaq. Artıq bu da bir sərt reallıqdır ki, Rusiyada Yeni ilə hazırlıqları istehlakçı fəallığının nəzərəçarpacaq dərəcədə azalması fonunda gedir. Ona görə ki, qiymətlərin qalxması Rusiya vətəndaşlarını xərcləri azaltmağa və ənənəvi xərclərdən imtina etməyə məcbur edir.
Bunlar Rusiya üçün, Putin üçün əlbəttə ki, çox pis xəbər və siqnallardır. Odur ki, işğalçı müharibə nə qədər tez dayandırılsa, ən əvvəl Rusiyaya faydası dəyər. Bir şərtlə, Moskva savaşdan qalib kimi ayrılmasın, dünyada belə bir rəy yaranmasın. Əks halda, “ağzında şirə qalan” Rusiya bir müddət sonra yeni ərazilər tutmağa həvəslənəcək. Götürdüyü bütün yeni yazılı öhdəliklərə məhəl qoymadan…
