…100 il öncə Qazi Mustafa Kamalın “Yurdda sülh, cahanda sülh” çağırışı sıradan bir şüar deyildi. Yurdunu imperialist güclərin işğalından azad edib istiqlalına qovuşduran Böyük Lider Türkün həm də dünyaya, bütün insanlığa barış arzuladığının mesajın verirdi. Savaş meydanında misli görünməyən bir qələbə qazanan sərkərdənin sülh arzusu dünya üçün bir örnək olmalı…
… 100 il sonra eyni örnək Azərbaycan Lideri tərəfindən göstərildi. Müzəffər Ali Baş Komandan kimi böyük dünya güclərinin himayəsində olan işğalçılara 44 günlük hərbi dərs keçərək tam Qələbəyə imza atan Azərbaycan Prezidenti gələcəyin güc yox sülh və sabitliyə bağlı olduğunu bəyan etdi. Prezident İlham Əliyev məhz bu mərhələdə qalib ölkənin lideri kimi revanşizmə deyil, sülh gündəliyinə üstünlük verərək Cənubi Qafqazı əməkdaşlıq məkanına çevirmək kimi olduqca çətin bir missiyanı məharətlə həyata keçirdi. Bu həm diplomatik, həm də humanizm baxımdan tarixi müqayisəsi olmayan bir addım idi…
Prezident İlham Əliyevin rəhbərliyi ilə həyata keçirilən uzaqgörən siyasət kursu bu gün Cənubi Qafqazı münaqişə ocağından sabitlik və əməkdaşlıq mərkəzinə çevirib. Beynəlxalq birliyin bu tarixi nailiyyətlərə verdiyi ali dəyər isə özünü nüfuzlu mükafatlarla büruzə verir. Bu sırada xüsusilə, 2026-cı ildə nüfuzlu beynəlxalq “Zayed İnsan Qardaşlığı Mükafatı”nın verilməsini qeyd edə bilərik. Prezident İlham Əliyevə təqdim olunan “Sülh və Barışıq üçün Gernika mükafatı” Azərbaycanın sülh gündəliyinin qlobal miqyasda qəbul olunmasının daha bir rəsmi təsdiqi kimi tarixə yazıldı. Azərbaycan Prezidentinin qısa müddət ərzində iki beynəlxalq sülh mükafatına layiq görülməsi həm də onu göstərir ki, sülh və harmoniya axtarışı bəşəriyyətin dəyişməz ali həqiqətləri sırasındadır və xüsusən, indiki sınaq məqamlarında daha çox əməl cizgisi kəsb edir. Müzəffər Liderimiz İlham Əliyev sübut etdi ki, öz dövlətinin, öz millətinin mənafeyini prioritetə çevirəndə, onun dəyərlərinə hörmət edəndə digər xalqlara, dövlətlərə də rəqib, yaxud istismar obyekti kimi baxmırsan, onlara məxsus olan dəyərlərə etinasız yanaşmırsan. Bu əxlaq siyasətini öz tərcümeyi-halına çox az dövlət başçısı yazdırmağa müvəffəq olub. Prezident İlham Əliyev bunu bacardı.
Azərbaycan artıq uzun müddətdir ki, müxtəlif mədəniyyətlərin, dinlərin və sivilizasiyaların qovuşduğu məkan kimi qlobal humanitar dialoqun mühüm platformasına çevrilib. Bakı Beynəlxalq Humanitar Forumları, Dünya Dini Liderlərinin Zirvə görüşləri, Mədəniyyətlərarası Dialoq Forumları və digər təşəbbüslər Azərbaycanın humanitar diplomatiyasının real təzahürləridir. Prezident İlham Əliyevin təşəbbüsləri ilə həyata keçirilən bu siyasət təkcə region üçün deyil, qlobal miqyasda sülh və anlaşma modelinin təqdimatıdır. “Sülh və Barışıq üçün Gernika mükafatı” məhz bu modelin beynəlxalq təsdiqi kimi dəyərləndirilməlidir. Bu mükafat Prezident İlham Əliyevin timsalında Azərbaycanın sülh fəlsəfəsinin, humanitar dəyərlərinin və qlobal məsuliyyətinin dünyada qəbul olunmasının simvoludur.
Bakının irəli sürdüyü və siyasi iradə ilə humanitar dəyərlərin harmoniyasına dayanan sülh gündəliyi hazırda bəşəriyyətin üzləşdiyi münaqişələrin həlli üçün universal model rolunu oynayır. Azərbaycanın yaratdığı bu uğurlu model sülhün yalnız arzu deyil, həm də real və əlçatan hədəf olduğunu nümayiş etdirir. Bu gün Prezident İlham Əliyevin qlobal liderlik missiyası təkcə Azərbaycanın deyil, bütövlükdə dünyanın sabitliyi və inkişafı üçün yol xəritəsidir: balanslı, müstəqil və milli maraqlara əsaslanan siyasət. Qalib ölkə olaraq Azərbaycan sülhü yalnız bəyanatlarla deyil, əməli addımlarla qurur və elə bu məram – sülh və əmin-amanlığın tam bərqərar olmasına çalışmaq əzmi bu gün İlham Əliyevin bəşər tarixinə verdiyi böyük töhfədir. Azərbaycan Prezidentinə verilən həm “Zayed İnsan Qardaşlığı Mükafatı”, həm də “Sülh və Barışıq üçün Gernika mükafatı” bir daha sübut edir ki, İlham Əliyev təkcə qalib lider deyil, həm də dünyada humanizmin, sülhün və birgəyaşayışın ən böyük müdafiəçisi, təminatçısıdır.
Səma şairi Hüseyn Cavid bəşəriyyətin xilasının ən mükəmməl yolunu belə ifadə etmişdi:
“Kəssə hər kim tökülən qan izini,
Qurtaran dahi odur yer üzünü”
Azərbaycan Lideri öz barış missiyası ilə dünyaya məhz bu qurtuluş yolunu göstərir!
