Məlum olduğu kimi, Mənzil Məcəlləsinə edilən dəyişikliyə əsasən “İşğaldan Azad Edilmiş Ərazilərdə Daimi Məskunlaşdırma Fondu” yaradılacaq. Fonda daxil olan yaşayış sahələri keçmiş məcburi köçkünlərə artıq icarə müqaviləsi əsasında deyil, mülkiyyət hüququ əsasında veriləcək ki, bu da ölkəmizin müstəqillik tarixində ən böyük, ən əhəmiyyətli hadisələrdən biridir.
Yaşayış sahələrinin keçmiş məcburi köçkünlərə mülkiyyət hüququ əsasında verilməsi işğal səbəbi ilə uzun illərdir ki, mənzil hüququndan məhrum olan vətəndaşlara yenidən bu hüququn qaytarılması deməkdir. Sözügedən dəyişiklik vətəndaşların sosial rifahına, mənzil-məişət şəraitinə, bugünü və gələcəyinə bilavasitə təsir göstərən hadisə olmaqla yanaşı, həm də yüz minlərlə insanın konstitusion hüququnun bərpasıdır.
Xatıladaq ki, Azərbaycan Respublikasının Konstitusiyasının 29-cu maddəsində vətəndaşların mülkiyyət, 33-cü maddəsində isə mənzil toxunulmazlığı hüququ olduğu vurğulanıb. Erməni işğalı keçmiş məcburi köçkünləri bu hüquqdan müvəqqəti məhrum etsə də, Prezident İlham Əliyevin liderliyi altında dövlətimizin azad edilən ərazilərdə həyata keçirdiyi nəhəng quruculuq işləri vətəndaşlarımızın bu hüquqlarının təmininə şərait yaradıb. Bu, Müzəffər Ali Baş Komandanın, Milli Məclisin, bütövlükdə dövlətimizin ölkə konstitusiyasına, vətəndaşlar hüquqlarına olan həssas münasibətini, təməl hüquqların qorunmasının zəruriliyinə verdiyi önəmi göstərir. Bu fakt bir daha onu deməyə əsas verir ki, Azərbaycan dövləti vətəndaşların sosial vəziyyətinin, mənzil-məişət şəraitinin daha da yaxşılaşmasını daim diqqət mərkəzində saxlayır, bu sahədə dəyəri milyardlarla hesablanan nəhəng layihələr həyata keçirir. Məhz buna görə də, Mənzil Məcəlləsinə edilən məlum dəyişiklik cəmiyyətdə məmnunluqla qarşılanmaqda, təqdir olunmaqda və dövlətin ədalətinə olan inamı artırmaqdadır.
Seymur ƏLİYEV
