” Rəhbər vəzifədə çalışan hər bir şəxs, hər bir məmur təvazökar olmalıdır”. Prezident İlham Əliyevin bu kəlmələri həmişə aktuallığını qoruyur və bu gün də günümüzün reallığını özündə əks etdirən əsas amillərdən biridir. Ali Baş Komandanın daim vurğuladığı “məmurlar xalqın keşikçisidir” deyimini özündə ehtiva etdirən vəzifə sahibləri həmişə xalq tərəfindən hörmətə layiq bilinib və sevilib. Məhərrəm Quliyev-Goranboy rayonunun İcra başçısı da məhz belə məmurlardan biridir. Hələ gənc yaşlarından müxtəlif vəzifələrdə çalışmasına baxmayaraq, həmişə ona olan etimadı doğrultmuş, üzərinə düşən öhdəçiliyi layiqincə yerinə yetirmişdir. M.Quliyev daim cəmiyyətin içində olur, vətəndaşları dinləyir, onları narahat edən problemləri yerindəcə həll etməyə çalışır. Tez-tez ictimaiyyətlə səyyar görüşlər keçirən başçı bu baxımdan bölgələrdəki icra nümayəndələrinə öz məsləhət və tövsiyələrini verir, vətəndaşların rahatlığı üçün əlindən gələni edir. Təsadüfi deyil ki, Goranboy rayonunun Tapqaraqoyunlu kəndi üzrə icra nümayəndəsi Abbas müəllim M.Quliyevin yerlərdə əhali ilə görüşməsini, onların qayğıları ilə maraqlanmasını özü üçün bir nümunə sayır, fəaliyyətində belə meyarları əsas götürür. Yəqin elə buna görədir ki, bütün tapqaraqoyunlular Abbas müəllimdən razılıq edir, onun nümunəvi fəaliyyətindən ağızdolusu danışırlar.
Əslində Prezident İ.Əliyevin göstəriş və tapşırıqlarını vaxtında və operativ yerinə yetirmək hər bir məmurun ən ümdə vəzifəsidir və bu böyük məsuliyyətin yükünü şərəflə, layiqincə çiyinlərində daşımaq hər bir adama nəsib olmur. Məhərrəm Quliyev isə bu məsuliyyətdən doğan fəaliyyəti ilə həmişə seçilmişdir. Goranboydan qabaq Ağstafanın başçısı vəzifəsində çalışan Məhərrəm müəllimin gördüyü işlər, rayon camaatının problemlərinin həlli istiqamətində atdığı addımlar, əhalinin rifahı naminə çalışqanlığından bu gün də xoş sözlər danışılır, ehtiramla bəhs olunur.
Əslində, bu gün hər bir məmur, vəzifə sahibi üçün Prezidentin fəaliyyəti etalon olmalıdır. Və yəqin ki, Məhərrəm müəllim də, Abbas müəllim də bunu çox gözəl bilir və öz fəaliyyətlərini də bu istiqamətdə qururlar.
