Bəzi yollar var ki, onlar insanı yalnız bir məkandan digərinə aparmır. Bu yollar insanı keçmişinə, kökünə, doğulduğu torpağa, ata-baba yurduna bağlayır. Lerik rayonunun Gendov kəndindəki Keroni yolu da məhz belə yollardandır.
Keroni yolu neçə-neçə nəslin dünyaya açılan ilk qapısı, doğma yurda qayıdışın isə son mənzili olub. Bu diyarda insanlar Bakıya üz tutarkən “aşağıya gedirəm” deyərdilər. Amma həmin “aşağıya” enmək üçün əvvəlcə Keroninin yoxuşunu aşmaq lazım gəlirdi. Elə buna görə də bu yol hər bir gendovlunun həyat salnaməsində silinməz iz qoyub.
İllər boyu Keroni yolu kənd sakinlərinin həm sevincinə, həm də kədərinə şahidlik edib. Bu yoldan toy karvanları keçib, övladlar elm dalınca yola düşüb, əsgərlər Vətənin keşiyinə yollanıb, doğmalar son mənzilə yola salınıb. Bu yolun daşları neçə-neçə gəncin arzusunu, ata ocağından ayrılan övladların həyəcanını, uzun ayrılıqlardan sonra kəndə dönən insanların sevincini öz yaddaşında yaşadıb.
Kənddə uzaqda yaşayan bir doğmanın qayıdacağı xəbəri yayılanda anaların, nənələrin baxışları saatlarla Keroni yoluna dikilərdi. O yoldan görünəcək bir insan, uzaqdan seçiləcək bir kölgə bəzən bütöv bir evin sevincinə çevrilərdi. Keroni yolu ümid yolu idi, həsrət yolu idi, qovuşma yolu idi…
Hər daşında bir xatirə, hər döngəsində bir ömür yaşayan bu yol Gendov sakinləri üçün heç vaxt adi yol olmayıb. O, kəndin yaddaşı, keçmişi və mənəvi sərvətidir.
Bu gün isə Keroni yolu yenidən tarix yazır.
Gendov kəndinin insanları bir daha sübut edirlər ki, böyük işlər yalnız böyük imkanlarla deyil, böyük ürəklərlə görülür. Kənd sakinlərinin öz təşəbbüsü, maddi dəstəyi və zəhməti hesabına Keroni yolu abadlaşdırılır. Kimisi maddi kömək göstərir, kimisi ağır texnikasını səfərbər edir, kimisi günlərlə zəhmət çəkir, kimisi də bir xoş sözlə, bir mənəvi dəstəklə bu birliyə güc qatır.
Bu, sadəcə yol təmiri deyil. Bu, doğma yurda sevginin, el birliyinin, kənd təəssübkeşliyinin və vətəndaş məsuliyyətinin ən gözəl təzahürlərindən biridir.
Bu gün Keroni yoluna baxanda insan yalnız hamarlanmış bir yol görmür. O yolda kənd sakinlərinin alın təri görünür. O yolda ata-babaların ruhuna ehtiram, gələcək nəsillərə qayğı və sabaha ümid görünür. Hər qarışında doğma kəndə bağlılıq, hər daşında birlik ruhu duyulur.
Çünki ən qiymətli sərvət nə asfalt, nə daş, nə də texnikadır. Ən böyük sərvət insanların bir-birinə olan inamı, bir amal ətrafında birləşmək bacarığıdır. Gendov kəndi bu inamı qoruyub saxladığını və onu əmələ çevirməyi bacardığını bir daha göstərdi.
Keroni yolunun abadlaşdırılması yalnız bu gün üçün görülən iş deyil, həm də sabaha qoyulan sərmayədir. Bu yol gələcək nəsillərə rahat gediş-gəliş bəxş etməklə yanaşı, onlara çox mühüm bir həqiqəti də xatırladacaq: doğma kəndi yaşadan yalnız onun evləri, yolları, bulaqları və torpağı deyil; onu yaşadan, hər şeydən əvvəl, bu yurda könüldən bağlı olan insanlardır.
Bəlkə də, illər keçəcək, Keroni yolu daha da abadlaşacaq, daha müasir görkəm alacaq. Amma bir həqiqət heç vaxt dəyişməyəcək: bu yolun təməlində Gendov insanının mərdliyi, zəhməti, birliyi və fədakarlığı dayanır.
Bu həmrəylik təkcə Gendov kəndi üçün deyil, bütövlükdə Lerik rayonu üçün örnək sayıla biləcək bir hadisədir. Çünki görülən işin arxasında doğma torpağa sevgi, ata-baba yurduna sədaqət və insanların bir-birinə güvəni dayanır. Birlik olan yerdə ən çətin yollar belə asanlaşır, ən böyük işlər uğurla başa çatır.
Bu gün hər bir gendovlu başını dik tuta bilər. Çünki bu insanlar gələcək nəsillərə yalnız abad bir yol deyil, həm də birlik, vəfa, həmrəylik və yurd sevgisi miras qoyurlar.
Sabah bu yoldan keçəcək uşaqlar bəlkə də bilməyəcəklər ki, onun hər qarışında neçə insanın zəhməti, neçə insanın xeyirxahlığı, neçə ürəyin doğma kənd sevgisi yaşayır. Amma kəndin yaddaşı bunu unutmayacaq. Tarix bunu unutmayacaq.
Əminliklə demək olar ki, bu xeyirxah əməl yalnız bu gün Gendovda yaşayan insanların deyil, bu torpaqda ömür sürmüş, bu yollardan keçmiş əcdadlarımızın da ruhunu şad edər. Çünki insanın doğulduğu yurda sahib çıxması, onun abadlığı üçün çalışması ən böyük mənəvi dəyərlərdən biridir.
Gendov bu gün öz tarixinin qürurverici səhifələrindən birini yazır.
Bu nəcib işdə zəhməti, əməyi, maddi və mənəvi dəstəyi olan hər kəsə dərin minnətdarlığımızı və ehtiramımızı bildiririk.
Var olsun Gendovun birlik ruhu!
Var olsun doğma yurduna sahib çıxan, onu yaşadan və abadlaşdıran fədakar insanlar!
Qoy Keroni yolu həmişə birliyin, xeyirxahlığın, vəfanın və doğma yurda sonsuz sevginin yolu kimi yaşasın!
Allah hər birinizi qorusun!
İlkin Əzizli, Gendov kənd sakini
Dil və ədəbiyyat müəllimi, Filoloq
